Xitay gérmaniye bilen ötküzidighan kishilik hoquq söhbitini bikar qildi


2007.10.15

Gérmaniye da'irilirining düshenbe küni ashkarilishiche, xitay hökümiti gérmaniye bilen bu yil 12 ‏- ayda ötküzmekchi bolghan kishilik hoquq söhbitini bikar qilghan. Gérmaniye tashqi ishlar ministirliqi, xitay da'irilirining kishilik hoquq söhbitini bikar qilish sewebini ashkarilimighan bolsimu, lékin gérmaniye "eynek" heptilik zhurnili xitayning herikiti gérmaniye bash ministiri an'géla mérkélning ötken ay tibet rohaniy dahisi dalay lamani bash ministirliq sariyida kütüwalghanliqidin öch élishni meqset qilghan, dep yazdi.

Gérmaniye tashqi ishlar ministirliqining eskertishiche, xitay da'iriliri gérmaniye terepke ötken peyshenbe küni söhbetning bikar qilin'ghanliqini uqturghan. Yéqinqi 10 yildin béri yilda bir qétim ötküzüp kéliwatqan gérmaniye - xitay kishilik hoquq söhbitide, gérmaniye xitayni kishilik hoquq we erkinlikke hörmet qilishqa ündep kelmekte idi. Gérmaniye tashqi ishlar ministirliqi bayanatchisi juliye gross, "biz xitayning söhbetni bikar qilghanliqidin epsuslinidighanliqimizni bildürimiz. Bu bizni epsuslandurghan 2 ‏- weqe, buningdin burun' qanunning roli' toghrisidiki söhbetni bikar qilghan idi " dep körsetti.

Xitay bilen gérmaniye ötken ay 'qanunning roli' dégen témida muhakime yighini ötküzmekchi bolghan bolsimu ,lékin xitay da'iriliri an'géla mérkélning dalay lamani qobul qilghanliqidin narazi bolup bu yighinni bikar qilghan. ' Eynek " heptilik zhurnili bir xitay diplomatik emeldarining sözini neqil keltürüp, an'géla mérkél bu yil 8 ‏- ayda xitayni ziyaret qilghanda dalay lama bilen körüshidighanliqini tilgha élipmu qoymighanliqi, xitay hökümitining " qattiq ghezipini qozghighan " dep körsetti. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.