Хитай пәләстинниң һаммас ташқи ишлар министирини хитайға тәклип қилди

Хитай һөкүмити чаршәнбә күни пәләстиндики һаммас тәшкилатидин келип чиққан ташқи ишлар министири махмуд захарни хитайға тәклип қилидиғанлиқини билдүрди һәмдә бейҗиңниң оттура шәрқтики мәнпәәтиниң нефиттин һалқиған һалда пәләстин билән исраилийиниң тинчлиқ мусаписини илгири сүрүшни көздә тутидиғанлиқини әскәртти.

Америка бирләшмә агентлиқиниң хәвәр қилишичә, хитай һөкүмити йеқиндин буян әрәб дөләтлири билән болған мунасивәтни алаһидә күчәйткән болуп, хитай мушу айниң ичидила әрәб дөләтлиридики министирлар вә карханичилардин болуп 23 нәпәр әрәбни хитайға тәклип қилип болған.

Пәләстин ташқи ишлар министири махмуд захар һаммас тәшкилатиниң қатмал рәһбәрлиридин болуп, америка вә явропа иттипақи һаммас тәшкилатини террорлуқ тәшкилат дәп һесаблиғанлиқи үчүн махмуд захар һөкүмитини әйибләп кәлгән иди. Мушундақ бир вәзийәттә хитайниң уни тәклип қилиши, америка билән хитай оттурисида йәнә бир нөвәт сүркилиш пәйда қилди.

Сиясий мулаһизичилар хитай һөкүмитиниң иқтисадий тәрәққиятиниң еһтияҗини қандуруш үчүн күчиниң беричә әрәб дөләтлири вә африқа дөләтлири билән алақини күчәйтип, америкидин нефит мәнбәсини талишиш көришини елип бериватқанлиқини билдүрмәктә. (Пәридә)