Amérika xitaydin import qilin'ghan su mehsulatlirini tekshürüshni kücheytidu

Amérika fédéral sehiye organlirining peyshenbe küni eskertishiche, amérika tamozhna da'iriliri xitay baqmichiliq pérmiliridin import qilin'ghan su mehsulatlirini , bu mehsulatlarda adem bedinige ziyanliq zeherlik maddilarning bar - yoqluqi éniqlan'ghiche tutup turidu. Amérika yimek - ichmek we dora bashqurush idarisining yardemchi bashliqi, deywid achéson, "bizning bu tedbirni qollinishimizdiki seweb, xitaydin import qilin'ghan bir qisim su mehsulatlirida qanun chekleydighan maddilarning barliqi üzlüksiz bayqiliwatqanliqidur. Bu maddilar amérikida sétilidighan su mehsulatlirida cheklen'gen," dep körsetti.

Achésonning eskertishiche, amérika 2006- yili 10 - aydin 2007 - yili 5 - ayghiche, xitaydin import qilin'ghan bir qisim su mehsulatliri üstidin tekshürüsh élip barghandin kéyin, bu mehsulatlarning anti - bi'otiktin éghir derijide bulghan'ghanliqini bayqighan.

Amérika tamozhna da'iriliri tekshürüshni kücheytken bu mehsulatlar déngiz raki, som béliqi qatarliq 5 türlük su mehsulatini öz ichige alghan. Amérika yimek - ichmek we dora bashqurush idarisidiki da'iriler, bu mehsulatlar salametlikke derhal tesir körsetmisimu, lékin uzun waqit istimal qilinsa kishilerni rak qatarliq késelliklerge giriptar qilidighanliqini agahlandurdi.

Xitay soda ministirliqi bayanatchisi peyshenbe küni bu mesile toghrisida bayanat élan qilip, xitayning bu mesilige "jiddiy diqqet qiliwatqanliqi " ni bildürdi. Lékin u, xitayning éksport mehsulatlirini aqlap,"junggo éksport qilghan pütün mehsulatlar kapaletke ige déyishke bolidu " dep körsetti. (Erkin)