Германийә бу дөләттики хитай җасуслирини тинтишни күчәйтти


2006.04.04
Share on WhatsApp
Share on WhatsApp

Германийидә чиқидиған "нуқта" жорнилиниң хәвәр қилишичә, германийә федирал асасий қанун қоғдаш идариси германийидики хитай әлчиханиси тәрипидин йитәклинидиған вә асасий нишани германийиниң мюнхин шәһирини мәркәз қилған шәрқий түркистан күчлириниң ичигә соқунуп кириш вә уларни тинтишни мәқсәд қилған җасуслуқ һәрикәтлири үстидин назарәт қилишни күчәйткән.

" Нуқта " жорнили, германийидики хитай ахбарат хадимлириниң германийидә яшайдиған шәрқий түркистан паалийәтчилири үстидин рәһимсизләрчә тинтиш вә назарәт елип барғанлиқини, һәтта уларға зораванлиқ вастилирини ишлитиштин янмиғанлиқини билдүрди.

Жорналниң федиратсийә асасий қанун қоғдаш идариси тәрипидин ички қисимда тарқитилған бир доклаттин нәқил кәлтүрүшичә, хитайниң берлин әлчиханиси риясәтчилик қилидиған җасусларниң "һилә ‏- микирләрчә һуҗуми" билән германийә җәмийтиниң һәр қайси қатламлирида җасуслуқ тори қурулған вә улар германийиниң һәрбий, иқтисади, илмий тәтқиқат вә сияси саһәсигә мунасивәтлик назук учурларни топлимақта икән.

"Нуқта" жорнилиниң әскәртишичә, германийә федирал асасий қанун қоғдаш идариси бу әһвалда хитай җасуслирини назарәт қилишни күчәйтишкә мәҗбур болған.

Шәрқий түркистан учур мәркизиниң ашкарилишичә, германийә федирал асасий қанун қоғдаш идариси, учур мәркизиниң рәһбири абдуҗелил қарақаш билән униң бихәтәрлики вә хитай тәрәптин униңға келидиған тәһдит амиллири үстидә сөһбәт елип барған. Федиратсийә асасий қанун қоғдаш идарисиниң бир әмәлдари, хитай җасуслириниң назарәт қилиш вә сиңип кириш обикти асаслиқи мюнхиндики " шинҗаңниң өз ‏- өзини идарә қилишини тәләп қилидиған мусулман уйғурларға қаритилғанлиқини" билдүргән. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.