Gérmaniye bu dölettiki xitay jasuslirini tintishni kücheytti

Gérmaniyide chiqidighan "nuqta" zhornilining xewer qilishiche, gérmaniye fédiral asasiy qanun qoghdash idarisi gérmaniyidiki xitay elchixanisi teripidin yiteklinidighan we asasiy nishani gérmaniyining myunxin shehirini merkez qilghan sherqiy türkistan küchlirining ichige soqunup kirish we ularni tintishni meqsed qilghan jasusluq heriketliri üstidin nazaret qilishni kücheytken.

" Nuqta " zhornili, gérmaniyidiki xitay axbarat xadimlirining gérmaniyide yashaydighan sherqiy türkistan pa'aliyetchiliri üstidin rehimsizlerche tintish we nazaret élip barghanliqini, hetta ulargha zorawanliq wastilirini ishlitishtin yanmighanliqini bildürdi.

Zhornalning fédiratsiye asasiy qanun qoghdash idarisi teripidin ichki qisimda tarqitilghan bir doklattin neqil keltürüshiche, xitayning bérlin elchixanisi riyasetchilik qilidighan jasuslarning "hile ‏- mikirlerche hujumi" bilen gérmaniye jem'iytining her qaysi qatlamlirida jasusluq tori qurulghan we ular gérmaniyining herbiy, iqtisadi, ilmiy tetqiqat we siyasi sahesige munasiwetlik nazuk uchurlarni toplimaqta iken.

"Nuqta" zhornilining eskertishiche, gérmaniye fédiral asasiy qanun qoghdash idarisi bu ehwalda xitay jasuslirini nazaret qilishni kücheytishke mejbur bolghan.

Sherqiy türkistan uchur merkizining ashkarilishiche, gérmaniye fédiral asasiy qanun qoghdash idarisi, uchur merkizining rehbiri abdujélil qaraqash bilen uning bixeterliki we xitay tereptin uninggha kélidighan tehdit amilliri üstide söhbet élip barghan. Fédiratsiye asasiy qanun qoghdash idarisining bir emeldari, xitay jasuslirining nazaret qilish we singip kirish obikti asasliqi myunxindiki " shinjangning öz ‏- özini idare qilishini telep qilidighan musulman Uyghurlargha qaritilghanliqini" bildürgen. (Erkin)