Америка палата әзалири хитай ишпийонлири америкиға тәһдит елип кәлмәктә дәп көрсәтти


2007.11.20

Йеқинда америка иқтисади, бихәтәрлик ишлири көзитиш комитети америка дөләт мәҗлисигә йиллиқ доклат сунуп "хитай ишпийонлири, америкиниң пән ‏- техника тәрәққиятиға тәһдит елип кәлмәктә" дәп көрсәткән.

Мәзкүр 2007 - йиллиқ доклатта хитайниң техника һәм иқтисадий ишпийонлуқ һәрикәтлириниң америкиға нисбәтән һәқиқәтән тәһдит һасил қиливатқанлиқи тәкитлинип, болупму хитайниң америкиниң һәрбий техникилирини сетивилиш арқилиқ өзиниң һәрбий күчини барғанчә ашуруватқанлиқи,шу сәвәблик америкиниң техникилириниң хитайниң һәрбий җәһәттин заманивийлишишида зор рол еливатқанлиқи көрситилип, америкиниң хитайниң ишпийонлуқиға қарши ахбарат мәхпийәтликини чиңайтишта йәниму җиддий тәдбир елиши керәклики тәкитләнгән.

Мәзкур комитет америка дөләт мәҗлисигә йәнә, хитай тәһдитини тосуш үчүн америка -хитай мунасивитидики һәрбий, иқтисадий, учур-ахбарат, муһит ишлири саһәлиригә алақидар 42 түрлүк тәдбир пиланиниму сунған.

20 - Ноябир хитай тәрәп америкида техника учурлирини оғрилаш, ишпийонлуқ һәрикәтлири елип барғанлиқини инкар қилған болуп, хитай ташқи ишлар министирлиқи баянатчиси лю җйәнчав ахбарат елан қилиш йиғинида " биз көп қетим җуңгониң башқа бир дөләтниң мәнпәәтигә зиян йәткүзидиған һәр қандақ һәрикәттә болмайдиғанлиқини, һәмкарлиқ мунасивити орнитишта оз ‏- ара баравәрликни асас қилидиғанлиқини тәкитләп кәлдуқ" дегән.

Америка дөләт мәҗлиси хитай ишлири комитети қурғучиси һәм рәиси ланди фурбусиниң билдүрүшичә, америкидики икки миңдин үч миңғичә болған хитай ширкәтлириниң һәқиқий муддиаси америкиниң һөкүмәт һәмдә карханилириниң мәхпий архиплирини оғрилаш икән. (Гүлчеһрә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.