Amérika dölet herbiy mexpiyetlikini xitaygha satqan 4 kishi qolgha élindi

Amérika edliye ministirliqining bildürüshiche, amérika dölet mudapi'e ministirliqining bir neper analizchisi we bo'én ayropilan yasash shirkitining bir neper inzhénéri herbiy mexpiyetlikni xitaygha ötküzüp bérish jinayiti bilen eyiblinip qolgha élin'ghan. Uningdin bashqa yene,xitay we teywendin amérikigha köchmen bolghan we amérika mudapi'e analizchisi bilen hemkarliship ishligen ikki neper xitaymu fédératsiye tekshürüsh idarisi teripidin qolgha élin'ghan.

Bu ikki xil délo amérikining wirjiniye shitati we kaliforniye shtatida yüz bergen bir ‏- birige munasiwetsiz ikki xil délolar bolsimu, emma oxshash künde sot qilin'ghan.

Amérika dölet adwokati kenneth wa'istyining bildürüshiche, bu nöwetlik qolgha élish amérika dölet herbiy mexpiyetlikini xitaygha sétishqa alaqidar eng yéngi dilo hésablinidighan bolup, u xitay hökümitining amérikining mexpiy herbiy téxnikilirini qolgha chüshürüshte qet'iy iradige kelgenlikini chüshendüridighan bir ishpiyonluq herikiti iken.

Kenneth wa'istyin ependi washin'gtonda ötküzülgen muxbirlarni kütiwélish yighinida, bu xildiki téxnikilarning xitayning qoligha chüshüp kétishidiki tehditning intayin éniq ikenlikide toxtilip: " bu dölitimizning bixeterlikige we dunyadiki iqtisadi ornigha éghir tehdit élip kélidu " dédi.

Melum bolushiche, bu yil 51 yashliq amérika dölet mudapi'esi qoral- yaraqlar séstimisi analizchisi greg w bergsen amérikining bezi mexpiy téxnika uchurlirini teywendin kelgen 58 yashliq xitay sodigerge sétiwetken bolup, ashkarilinishiche, téy ku isimlik bu xitay esli teywenlik bolup, u kéyin amérika dölet puqraliqigha ötken we mezkur téxnika uchurlirini xitay hökümitige yetküzüp bergen iken.

Bularning ichide yene bir neper xitay puqrasimu bar bolup, u bu yil 33 yashqa kirgen yu shinkang. U tey ku bilen xitay hökümiti arisida kélishtürgüchilik rolini ötigen. Melum bolushiche, bu herbiy uchurlar ichide amérika hökümitining kelgüsi besh yil ichide herbiy téxnika we qoral ‏- yaraqlarni sétip bérish pilanining tepsilati bar iken.

Hazir tey ku dölet mexpiyetlikini chet'ellerge yetküzüp bérish jinayiti bilen eyiblinip ömürlük qamaqqa élinish aldida turmaqta.

Bu nöwet sotlan'ghanlarning yene birsi ilgiri bo'én shirkitide inzhénér bolup ishligen dung fen isimlik xitay bolup, uning 1979- yilidin bashlap xitay hökümitige bo'én shirkitining alem qatnishigha a'it téxnika yéngiliqlirini xitaygha yetküzüp bérip kéliwatqanliqi ashkarilan'ghan.

Dung fen 1973- yilidin 1996- yilighiche bo'én shirkitining rokwél mudapi'e we alem qatnishi shirkitide ishligen bolup, uning mushu jeryanda amérikining alem ayropilanining téxnikilirini xitaygha yetküzüp bergenliki melum. (Jüme)