Xitay amérikida jasusluq herikiti élip barghanliqini inkar qildi

Xitay tashqiy ishlar ministirliqi xitayning amérikida jasusluq herikiti élip barghanliqini inkar qilip, amérika bixeterlik organlirining amérika herbiy mexpiyetlikini oghrilighan xitay jasusluq torining tar ‏- mar qilin'ghanliqi heqqidiki xewerni asassiz, dep ret qildi we bu türdiki eyibleshler xitay - amérika munasiwetlirige ziyan -zexmet yetküzidighanliqini ilgiri sürdi.

Xitay tashqiy ishlar ministirliqi bayanatchisi lyu jyenchaw bu türdiki eyibleshler pütünley yaman gherezlik bolup, bu soghuq munasiwetler dewridiki tepekkurning mehsuli, deydu. Lékin u , amérika bixeterlik organliri qolgha chüshürgen jasuslarning xitay jasusi yaki emeslikige jawab bermidi. Amérika edliye tarmaqliri aldinqi küni wirjiniye we kaliforniye shitatlirida amérika herbiy we téxnika uchurlirini oghrilighan 2 ayrim - ayrim jasusluq weqeside 4 neper jasusning qolgha élin'ghanliqini, bularning biri amérika dölet mudapi'e ministirliqida ishleydighan herbiy, qalghan 3 i amérika tewelikidiki xitaylar bolup, xitaylarning birining uzun yillar amérika alem qatnishi tetqiqat saheside xizmet qilghanliqini élan qilghan.

Amérika bixeterlik mutexessisliri xitayning amérikidiki jasusluq pa'aliyiti soghuq munasiwetler dewridiki sewiyige yetkenlikini we xitay jasusluq organlirining amérikida xizmet qilidighan xitaylarni yallawatqanliqini ilgiri sürmekte. Ularning eskertishiche, amérika herbiy téxnika uchurlirini oghrilash xitayning dölet siyasiti bolup qalghan. Bu qétimqi jasusluq weqeside qolgha élin'ghan amérika dölet mudapi'e ministirliqi xadimi bérgérsén, ministirliqning qoral - yaraqlar séstima analizchisi bolup, amérika bilen teywen arisidiki qoral - yaraq sodisigha arilashqan. Bu weqe teywen da'iriliriningmu sezgürlikini qozghighan bolup, ular tekshürüsh élip baridighanliqini élan qildi. (Erkin)‏