Amérika kéngesh palata ezaliri xitaygha qarshi qanun layihisi sundi

Amérika - xitay soda munasiwetliridiki qizil reqemge qarita künséri naraziliqi küchiyiwatqan amérika kéngesh palatasining nopuzluq ezaliri, 13‏- iyun küni béyjing hökümitining iksportni köpeytish üchün xitay pulining qimmitini töwen tutush siyasitige qarshi, jaza yolgha qoyush üchün bir qanun layihisi sundi.

Amérika dölet mejlisi kéngesh palatasining jumhuriyetchi we démokrat partiyilirige mensup ezaliri teripidin sunulghan bu qanun layihiside, amérika -xitay soda munasiwetliridiki qizil reqemni azaytish üchün, amérika hökümitining xitaygha qarshi jiddiy tedbir qollinishi kérekliki otturigha qoyulghan.

Bush hökümiti bu qanun layihisini ret qilishi mumkin bolsimu, emma dölet mejlisining nurghunlighan ezaliri we mutexessisler, amérika dölet mejlisi , prézidént bushning ret qilish tehditige qarimay , bu yil her qandaq qilip, xitaygha qarshi bir qanun layihisi qobul qilishi mumkin,déyishmekte.

Amérika maliye ministiri henri pawelson, xitay hökümitini, eger xitay bazirini chet'el sodigerlirige ichip, xitay puli üstidiki kontrolluqini azaytmisa, amérika hökümiti xitaygha qarshi qanun layihisining dölet mejliside qobul qilinishining aldini alalmaydu, dep agahlandurghan idi.

Siyasiy mulahizichiler, amérika dölet mejliside xitaygha qarshi jiddiy tedbir élish mesliside qozghalghan yéngi dolqun, xitay hökümitining pawelsonning agahlandurushlirigha pisent qilmighanliqini körsitidu, déyishmekte. (Eqide)