Далай лама канада баш министири стипан харпер билән көрүшкән


2007.10.30

Тибәт роһани даһиси далай лама 3 күнлук канада зияритиниң бир қисими сүпитидә дүшәнбә күни канада баш министири стипан харпер билән, униң канада парламент бинасидики ишханисида көрүшкән болуп, сөһбәттә далай лама стипан харперниң " кишилик һоқуқ мәсилисидики җиддий позитсийиси"ни мәдһийилигән. Бу канада баш министирлириниң далай ламани тунҗи қетим қобул қилиши болмисиму, лекин бу баш министириниң далай ламани тунҗи қетим дөләт сорунида күтивелишидур.

2004 ‏- Йили әйни чағниң канада баш министири паул мартин далай лама билән рим католик архибишопиниң оттавадики шәхси өйидә учрашқан. Стипан харпер, 2006 ‏- йили 12 ‏- айда уйғур рәһбири рабийә қадир ханимни парламент бинасида күтүвалған иди.

Далай лама оттаваға йәкшәнбә күни кәлгән шундақла у шу күни оттавадики бир залда қоллиғучилириға сөз қилип, "хитай байриқидики 5 юлтуз манҗу, моңғул, уйғур, тибәт вә хәнзу қатарлиқ бәш милләткә вәкиллик қилатти. Лекин һазир бу байрақ хәнзулардин башқа һечкимгә вәкиллик қилмайдиған болди" дәйду. У канада мәдәний ядикарлиқлар министири җейсен кенней билән көрүшкәндә" мениңчә хитайниң мунасивәтлик органлири министирлиқиңизниң иттипақлиқни өз ‏- ара һөрмәт асасида қандақ әмәлгә ашуруватқанлиқини көпрәк өгәнсә болғудәк "дәп көрсәтти.

Далай лама бу йил 8 ‏- айдики германийә вә 10 ‏- айдики америка зияритидә хитайниң қаршилиқиға учриған болса, бу қетим униң канада зиярити йәнә хитайниң кәскин қарши турушиға учриди. Хитайниң канададики әлчиханисиниң консули сүн лушән өткән һәптә стипан харперниң далай ламани күтүвалмақчи болғанлиқини әйибләп, канада "бир тәрәптин тибәтни җуңгониң бир қисими, дәп етирап қилса, йәнә бир тәрәптин далай ламани рәсмий йосунда күтүвалмақчи болуватиду. Бу кишиләргә хата сигнал бериду " дәп тәнқид қилған. (‏Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.