Dalay lama kanada bash ministiri stipan xarpér bilen körüshken

Tibet rohani dahisi dalay lama 3 künluk kanada ziyaritining bir qisimi süpitide düshenbe küni kanada bash ministiri stipan xarpér bilen, uning kanada parlamént binasidiki ishxanisida körüshken bolup, söhbette dalay lama stipan xarpérning " kishilik hoquq mesilisidiki jiddiy pozitsiyisi"ni medhiyiligen. Bu kanada bash ministirlirining dalay lamani tunji qétim qobul qilishi bolmisimu, lékin bu bash ministirining dalay lamani tunji qétim dölet sorunida kütiwélishidur.

2004 ‏- Yili eyni chaghning kanada bash ministiri pa'ul martin dalay lama bilen rim katolik arxibishopining ottawadiki shexsi öyide uchrashqan. Stipan xarpér, 2006 ‏- yili 12 ‏- ayda Uyghur rehbiri rabiye qadir xanimni parlamént binasida kütüwalghan idi.

Dalay lama ottawagha yekshenbe küni kelgen shundaqla u shu küni ottawadiki bir zalda qollighuchilirigha söz qilip, "xitay bayriqidiki 5 yultuz manju, mongghul, Uyghur, tibet we xenzu qatarliq besh milletke wekillik qilatti. Lékin hazir bu bayraq xenzulardin bashqa héchkimge wekillik qilmaydighan boldi" deydu. U kanada medeniy yadikarliqlar ministiri jéysén kénnéy bilen körüshkende" méningche xitayning munasiwetlik organliri ministirliqingizning ittipaqliqni öz ‏- ara hörmet asasida qandaq emelge ashuruwatqanliqini köprek ögense bolghudek "dep körsetti.

Dalay lama bu yil 8 ‏- aydiki gérmaniye we 10 ‏- aydiki amérika ziyaritide xitayning qarshiliqigha uchrighan bolsa, bu qétim uning kanada ziyariti yene xitayning keskin qarshi turushigha uchridi. Xitayning kanadadiki elchixanisining konsuli sün lushen ötken hepte stipan xarpérning dalay lamani kütüwalmaqchi bolghanliqini eyiblep, kanada "bir tereptin tibetni junggoning bir qisimi, dep étirap qilsa, yene bir tereptin dalay lamani resmiy yosunda kütüwalmaqchi boluwatidu. Bu kishilerge xata signal béridu " dep tenqid qilghan. (‏Erkin)