Канада ‏- хитай мунасивәтлири яманлишишқа башлиди


2007.11.09

Өткән йилидин бери йириклишип һазир азрақ юмшашқа башлиған канада- хитай мунасивәтлири, канада баш министири ситифин харпер алдинқи һәптә тибәтләрниң роһаний даһийси далай ламани қобул қилғандин кийин йәнә йириклишишкә башлиди.

Йәршари мәктуплири гезитиниң бу һәқтә бәргән хәвиридин ашкарилинишичә, хитай тәрәп канада һөкүмитиниң далай ламани қобул қилғанлиқиға өз наразилиқини билдүрүш үчүн хитай- канада дипломатийә хадимлири арисида елип берилиш пиланланған бир муһим учришишни әмәлдин қалдурған.

Мәзкур учришиш канада-хитай истратегийилик ишлар гурупписи дәп атилидиған комитети намида елип берилидиған болуп, бу комитети 2005 - йили паул мартин һөкүмити тәрипидин иҗат қилинған вә хитай билән "истратегийилик һәмкарлиқ"орнитиш мәқситидә, сода мәбләғ селиш, енергийә вә килимат өзгиришигә аит мәсилиләрдә сөһбәт елип барған иди.

Йәршари мәктуплири гезитидә көрситилишичә, ситифин харпер һөкүмити юқирида оттуриға қоюлған "истратегийилик һәмкарлиқ" уқумидин өзини қачуруп, хитай билән алақә орнитиш дегән аталғуни ишлитишни халимайдиғанлиқини билдүргән.

Йәршари мәктуплири гезитидә алберта университетидики сиясий тәтқиқатчи веран җяңниң ейтқанлирини нәқил елип көрситилишичә, бир қатар мәсилиләрдә канада хитайни дост дәп тонумайдиған болуп, һазир канадада хитай сиясити вә хитай истиратегийиси йоқ икән.

Җяң мундақ дәйду: " бу бизниң мунасивитимизгә еғир тәсир көрситиду. Әмәлийәттә һазир мунасивәтлиримиз бәк суслишип кетиватиду." (Җүмә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.