Xitay tashqi ishlar ministirliqi amérikining 2007 ‏ - yilliq kishilik hoquq doklatigha naraziliq bildürdi

Amérika tashqi ishlar ministirliqi 2007 ‏ - yilliq kishilik hoquq xatirisi heqqidiki doklatini élan qilip, mezkür doklatta ötken yil we aldinqi yillardikige oxshimaydighinini, xitayni kishilik hoquq ehwali heddidin tashqiri derijide nachar aldinqi 10 dölet tizimlikige kirgüzmigen we buning sewebining amérika bilen xitay otturisidiki kishilik hoquq di'alogining eslige kéliwatqanliqidin qaynaqlan'ghanliqini tekitligen idi.

Biraq, xitay tashqi ishlar minisitirliqining axbarat ishxanisi peyshenbe küni, amérikining " kishilik hoquq doklati" ni qattiq tenqid qilish bilen birge, amérikida kishilik hoquqqa xilap heriketlerning éghir derijide sadir boluwatqanliqini otturigha qoydi.

Amérika tashqi ishlar ministirliqining 2007 ‏ - yilliq kishilik hoquq xatirisi'i toghrisidiki yilliq doklatning xitaygha a'it qismi 139 betlik bolup, mezkür doklatta, xitay xelq jumhuriyitining bir mustebit dölet ikenliki, bolupmu xitay kompartiyisining pütün hoquqni igiliwalghan bir partiyilik dölet ikenliki alahide tekitlen'gen, bolupmu Uyghur we tibetke oxshash xitay bolmighan milletlerning medeniy we diniy jehette qattiq basturuluwatqanliqi tilgha élin'ghan idi.

Doklatta yene, xitayning Uyghurlarni bölgünchilik jinayiti bilen jazalash, qesten we qanunsiz adem öltürüsh qilmishlirini sadir qilish heriketliri tenqid qilin'ghandin sirt, xitay hökümitining, Uyghur milliy herikitining rehbiri rabiye qadir xanimgha zerbe bérish meqsitide uning perzentlirini türmige tashlighanliqi qatarliq mesililermu alahide tekitlen'gen. (Eqide)