Кишилик һоқуқ тәшкилатлири шветсарийә банкисини хитай нефит ширкити билән һәмкарлашмаслиққа чақирди


2007.10.22

Холливуд артиси мия фаров қатарлиқларни өз ичигә алған кишилик һоқуқни қоллиғучи әрбаплар вә нобил мукапатиға еришкүчи бир қисим затлар шветсарийә бирләшмә банкилар гуруһиға хәт йезип, мәзкур банкини хитай нефит - тәбий газ пай чеки чәклик ширкитиниң шаңхәй аксийә базирида пайчик тарқитиш пиланиға арилишиштин ваз кечишкә чақирди.

Хитай нефит - тәбий газ гуруһи хитай нефит - тәбий газ пай чеки чәклик ширкитигә пайчик болуп, җуңго нефит ‏- тәбий газ гуруһи судан нефит игиликигә әң көп мәбләғ салғучи кархана иди. Бу хәткә б д т ниң рувандадики тинчлиқни қоғдиғучи қисиминиң сабиқ қомандани, канада кеңәш палата әзаси даллер вә б д т судан мәсилисидики сабиқ келиштүргүчи әмәлдари кабилалар имза қойған болуп, улар шветсарийә банкиси билән хитай нефит ширкитиниң һәмкарлиқидин әндишә қиливатқанлиқини билдүргән.

Хәткә имза қойғучи затларниң әскәртишичә, хитай нефит - тәбий газ гуруһи судан һөкүмитини малийә кирими билән тәминләп, хартум һөкүмитиниң дарфур районидики қирғинчилиқиға ярдәм бәрмәктә. Улар йәнә, хитай нефит - тәбий газ гуруһини судандики йәрлик хәлқни нефит чиқидиған районлардин мәҗбурий көчүрүшкә арилашқан,дәп әйиблиди.

Җуңго нефит ‏- тәбий газ гуруһи суданға мәбләғ салған кархана болупла қалмай, у йәнә уйғур аптоном районида нефит - тәбий газ қезиш мәшғулати елип бериватқан вә йәрлик хәлқниң наразилиқиға учриған әң чоң хитай ширкитидур. Лекин шветсарийә бирләшмә банкилар гуруһи, җуңго нефит ‏- тәбий газ гуруһи җуңго нефит ‏- тәбий газ пай чеки ширкитигә пайчик болсиму, лекин бу икки кархана қануни вакаләтчиси айрим - айрим икки ширкәттур, дәп әскәртип, өзлириниң суданға херидар ширкәт билән бериш - келиш қилмиғанлиқини билдүрди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.