Хәлқара кәчүрүм тәшкилати хитайда өткүзүлидиған олимпик тоғрисида доклат елан қилди

30- Април хәлқара кәчүрүм тәшкилати доклат елан қилип, хитай һөкүмитини 2008-йили өткүзүлидиған олимпик йиғининиң иҗтимаий муқимлиқини сақлашни козур қилип туруп җәмийәттики өктичи күчләрни қаттиқ бастурди дәп әйиблиди вә олимпик йиғинниң хитайдики техиму қаттиқ зәрбә бериш ишлириға тутуруқ болғанлиқини көрсәтти.

Хәлқара кәчүрүм тәшкилати асия-тинч окян бөлүминиң муавин башлиқи Catherine Barber мундақ деди: "өлум җазалири үстидин елип берилидиған йәнә бир қатлам әдилийә тәкшүрүш тәртипи, чәтәл мухбирлириға нисбәтән чәклиминиң бурунқидин азрақ болуши қатарлиқлар хитайдики кишилик һоқуққа болған һөрмәтниң яхшилиниши җәһәттики муһим қәдәмләрниң бири болсиму, лекин адәмни үмидсизләндүридиған йери, сот ачмай тутуп туруш хаһишлириниң еғирлишиши, кишилик һоқуқ паалийәтчилирини ‘реҗимға елиш’, дөләт ичидики ахбарат вә интернеткә болған қаттиқ контроллуқлар буларниң һәммисини бикар қиливәтмәктә".

Хитай һөкүмити мәзкур тәшкилатниң доклатиға рәдийә берип, өзлириниң кишилик һоқуқни яхшилашта илгириләш һасил қилғанлиқини әскәртти.

Франсийә агентлиқиниң 30 ‏- април бәргән хәвәрдә хитай ташқи ишлар министирлиқи тәминлигән мәлуматларни нәқил кәлтүрүшичә, хитай ташқи ишлар министирлиқи: "хусусй тәшкилатлар тәрипидин елан қилинған ғәйрий сиясий муддиа йошурунған доклатлар хитайниң кишилик һоқуқни илгири сүрүш җәһәттики йүксилишлириниң алдини тосуп қалалмайду" дегән.

Лекин хәлқара кәчүрүм тәшкилати, хитайдики кишилик һоқуқ мәсилиси җәһәттә хәлқара олимпик комитети чоқум 2008-йилидики олимпик йиғиниға қәдәр хитайға бесим ишлитиш керәкликини билдүрди.(Җүмә)