Xelq'ara muxbirlar teshkilati olimpik komitétini xitay mesiliside eyiblidi

Merkizi parizhdiki chégrisiz muxbirlar teshkilati xelq'ara olimpik komitétini xitay da'irilirining muxbirlargha tutqan esebiy mu'amilisige köz yumush bilen eyiblidi. Chégrisiz muxbirlar teshkilati xelq'ara olimpik komitéti re'isi jaks rogégha yazghan xétide "xitay da'irilirining kéler yili olimpik yighinigha qatnishidighan minglarche muxbirni bir terep qilish pilani tüzüwatqanliqigha da'ir kishini "bi'aram qilidighan xewerler" alghanliqini tekitligen.

Chégrisiz muxbirlar teshkilatining bash katipi robért ménard, " shu nerse nahayiti aydingki, béyjing olimpik yighinini teshkilligüchiler we xitay bixeterlik apparatliri olimpik yighinidin burun we olimpik yighini jeryanida muxbirlarni yéqindin kontrol qilish qararigha kelgen" dep körsetti. Bu yilning bashliri bezi metbu'atlar xitay da'irilirining mexsus uchur ambiri qurup, xitay hökümitining menpe'etige zit xewer béridighan chet'ellik muxbirlarning olimpik yighinigha qatnishishini cheklimekchi boluwatqanliqini ilgiri sürgen. Lékin xitay da'iriliri bu uchur ambiri chet'ellik muxbirlarning arqa körünüshini tekshürüsh meqsitide qurulghanliqini ret qilmaqta.

Chégrisiz muxbirlar teshkilatidiki robért ménard, xewerlerdiki xitay hökümitining uchur ambiri qurghanliqini we xelq'ara olimpik komitéti bu muxbirlargha salahiyet bergen teqdirdimu, lékin xitay da'irilirining ularni ret qilish hoquqini saqlap qalmaqchi boluwatqanliqini tekitligen. Chégrisiz muxbirlar teshkilati xétide yene, rehberlikning j x ministirliqigha olimpik jeryanida namayish qilish éhtimali bar guruhlarni éniqlash yolyoruqi chüshürgenliki we bu xitaygha kiridighan nurghun kishilerni tosup qoyidighanliqini eskertmekte. (Erkin)