Xelq'ara olimpik komitétining re'isi xitay hökümitining basturush heriketliridin endishe qiliwatqanliqini bildürdi

Yekshenbe küni xelq'ara olimpik komitétining re'isi jakus roggé muxbirlargha xitay hökümitining hazir tibet we qoshna rayonlarda élip bériwatqan basturush heriketliridin endishilen'genlikini, buning bu yil yazda béyjingda ötküzilidighan olimpik yighini üchün yaman tesir peyda qilidighanliqini bildürdi.

Birleshme agéntliqida neqil qilinishiche, roggé özining saynt lusi'otidiki ziyariti jeryanida muxbirlargha: "biz intayin endishilenduq. Komitétimiz shuni ümid qiliduki, bu xil ehwal pat yéqinda bésiqqusi" dégen. U yene, tebi'ettiki toqunushqa qaza qilghanlarning a'ile tawabi'atliridin semmiy hal soraydighanliqini bildürgen.

Halbuki, roggé shenbe küni, tibette yüz bergen zorawanliq tüpeyli olimpikni bayqut qilishqa bolmaydighanliqini, bundaq bolghanda tenheriketchiler üchün adil bolmaydighanliqini bildürgen idi.

10 - Marttin buyan tibet we qoshna rayonlarda xitay hakimiyitige qarshi musteqilliq namayishliri dawam étiwatqan bolup, xitay armiyisi we tibet rahibliri arisida bir qatar toqunushlar yüz bergen hemde toqunush jeryanida nurghun adem yarilan'ghandin bashqa hazirgha kelgüche 80 ge yéqin adem ölgen bolup, buni tibetlerning rohani dahiysi dalay lama "medeniyet qirghinchiliqi" dep eyibligen idi.

Gerche xitay hökümiti bu yil awghustta béyjing ötküzilidighan 2008 - yilliq béyjing olimpiki bilen özining dölet ichi we sirtidiki obrazini téximu yuqiri körüshni meqset qiliwatqan bolsimu, emma bu nöwet tibette yüz bergen toqunush we basturush xitayning bu arzusining utuqluq emelge éshishigha mu'eyyen selbiy tesirlerni élip kelmekte. (Jüme)