Xitay ötkünchi hökümiti xitapnamisi élan qilindi

Chet'ellerdiki xitay démokratlirining tor betlirining 2008 - yili 1 - yanwar xewerliridin melum bolushiche, xitayning chet'eldiki démokratliri, xitay ötkünchi hökümitining resmiy qurulghanliqini jakarlap, özining xitapnamisini élan qildi. Xitay ötkünchi hökümiti, chet'eldiki xitaylarning chégrisiz, iqtisadiy menpe'etsiz teshkilati, ötkünchi hökümet xitay tupriqigha yerlishishtin burun, ezalargha dölet teweliki, kimlik, yash cheklimiliri telep qilinmisimu, emma choqum xitay kommunistik partiyisidin chékin'gen bolushi shert qilin'ghan.

Xitay ötkünchi hökümet xitapnamisida, xitay ötkünchi hökümitining xaraktéri - xitayda kommunistik tüzümni bikar qilip, démokratik islahat élip bérish shundaqla hakimiyetke xelq igidarliq qilidighan siyasetning heqiqiy simwoli dep körsitilgen.

Mezkur xitapnamida yene, xitay kommunist hökümiti xitay xelqini siyasiy hoqoqigha tayinip basturup kontrol qiliwatqan hakimiyet, xitay xelqi alla burunla siyaset hem medeniyet jehettin qul qilin'ghan.Xitayning hazirqi emeliyitimu ispatlayduki, xitayning rehberlik qatlimi bolsa ichi ‏- ichidin chirigen, parixor qara qol guruh. Xitay kompartiyisi bolsa del bu qara qollarni terbiyiligen hem ularni qoghdaydighan eksiche xelqning menpe'eti, barliq qanuniy hoquqlirini depsende qilidighan qara siyasiy küch déyilgen shundaqla xitay ötkünchi hökümitining tüp nishanining,xitayda barliq sahelerdiki heqni qoghdighuchi ammini birlikke keltürüp, démokratiye hem kishilik hoquqqa tosalghuluq qiliwatqan barliq siyasiy tosalghularni süpürüp tazilash dep eskertilgen.

Nöwette, xitay ichi hem sirtidiki öktichi, démokratiyichi küchler barghanche uyushuwatqan bolup, xitay kommunistik partiyisidin chékinip chiqquchilarning barghanche köpiyiwatqanliqi bildürülmekte. (Gülchéhre)