Пакистан билән хитай сода - иқтисади мунасивитини күчәйтти

Хитай билән пакистан чаршәнбә күни икки дөләт оттурисидики сода -иқтисади мунасивәтлирини күчәйтидиған бир қатар келишимләрни имзалиди. Пакистан һөкүмити хитайни базар игиликидики дөләт дәп тонуйдиғанлиқини җакалиған. Шундақла хитай һөкүмити бейҗиңни зиярәт қиливатқан пакистан баш министири шавкәт әзизгә пакистанниң ядро ениргийә истансиси қурулуши үчүн, 150 милйон доллар ярдәм беридиғанлиқини вәдә қилған.

Чәтәл мәтбуатлири икки тәрәпниң чаршәнбә күни 7 түрлик келишим имзалиғанлиқини хәвәр қилди. Келишимләрниң көп қисими икки дөләт оттурисидики сода мунасвитини кеңәйтишкә алақидар болуп, бирақ һәр икки тәрәп келишимниң мәзмуни һәққидә тәпсили мәлумат елан қилмиди. Хитайдики зияритини сәйшәнбә күни башлиған шавкәт әзиз, чаршәнбә күни хитай баш министири вен җябав билән сөһбәт елип барди.

Ройтерс ахбарат агентлиқиниң хәвәр қилишичә, пакистанни мәбләғ билән тәминләйдиған асаслиқ дөләт болуп қалған хитай һөкүмити, ахирқи күнләрдә пакистандики хитай пуқралириниң бихәтәрликидин әнсирәшкә башлиған.

Шинхуа ахбарат агентлиқиниң хәвәр қилишичә вен җябав, хитай билән пакистанниң иқтисади һәмкарлиқни кеңәйтидиғанлиқи, тәрорлуқ һәрикәтләргә қарши һәмкарлиқни күчәйтидиғанлиқини елан қилған. Хитай пакистанни қорал - ярақ билән тәмиләйдиған әң муһим дөләт. Амирка хитайни пакистанға ядро әслиһәләр сатмаслиқ һәққидә көп қетим агаһландурған. Пакистан уйғурларниң хитайға қарши пакистандики паалийитини чәклигән. Шундақла икки тәрәп 2004 -йили 8 - айда ташқорғанда бирләшмә маневир елип барған иди.(Әркин)