Pakistan bilen xitay soda - iqtisadi munasiwitini kücheytti

Xitay bilen pakistan charshenbe küni ikki dölet otturisidiki soda -iqtisadi munasiwetlirini kücheytidighan bir qatar kélishimlerni imzalidi. Pakistan hökümiti xitayni bazar igilikidiki dölet dep tonuydighanliqini jakalighan. Shundaqla xitay hökümiti béyjingni ziyaret qiliwatqan pakistan bash ministiri shawket ezizge pakistanning yadro énirgiye istansisi qurulushi üchün, 150 milyon dollar yardem béridighanliqini wede qilghan.

Chet'el metbu'atliri ikki terepning charshenbe küni 7 türlik kélishim imzalighanliqini xewer qildi. Kélishimlerning köp qisimi ikki dölet otturisidiki soda munaswitini kéngeytishke alaqidar bolup, biraq her ikki terep kélishimning mezmuni heqqide tepsili melumat élan qilmidi. Xitaydiki ziyaritini seyshenbe küni bashlighan shawket eziz, charshenbe küni xitay bash ministiri wén jyabaw bilen söhbet élip bardi.

Roytérs axbarat agéntliqining xewer qilishiche, pakistanni meblegh bilen teminleydighan asasliq dölet bolup qalghan xitay hökümiti, axirqi künlerde pakistandiki xitay puqralirining bixeterlikidin ensireshke bashlighan.

Shinxu'a axbarat agéntliqining xewer qilishiche wén jyabaw, xitay bilen pakistanning iqtisadi hemkarliqni kéngeytidighanliqi, terorluq heriketlerge qarshi hemkarliqni kücheytidighanliqini élan qilghan. Xitay pakistanni qoral - yaraq bilen temileydighan eng muhim dölet. Amirka xitayni pakistan'gha yadro esliheler satmasliq heqqide köp qétim agahlandurghan. Pakistan Uyghurlarning xitaygha qarshi pakistandiki pa'aliyitini chekligen. Shundaqla ikki terep 2004 -yili 8 - ayda tashqorghanda birleshme manéwir élip barghan idi.(Erkin)