Пакистанниң юқири дәриҗилик әмәлдари террорлуққа қарши сөһбәт өткүзүш үчүн хитайға кәлди


2007-06-25
Share

Кишилик һоқуқ тәшкилатлири исламабад һөкүмитигә аталмиш террор гумандарлирини хитайға қайтуруп бәрмәслик тоғрисида бесим қилип узун өтмәй, 25- июн дүшәнбә күни пакистанниң юқири дәриҗилик дөләт әмәлдари, хитай билән террорлуққа қарши туруш һәмкарлиқини йәниму күчәйтиш үчүн бейҗиңға йетип кәлди.

Пакистан ички ишлар министири афтабхан шерпа дүшәнбә күни әтигәндә бейҗиңға йетип кәлгән болуп, шинхуа агентлиқи бу һәқтә бәргән хәвәрдә көрситишичә, у, хитай җамаәт хәвпсизлик министири җу йүнкаң вә башқа хәвпсизлик әмәлдарлири билән көрүшидикән. Мәлум болушичә, икки тәрәп террорлуққа қарши туруштики һәмкарлиқини күчәйтиш вә пакистанда яшап, хизмәт қиливатқан хитай пуқралириниң бихәтәрлики қатарлиқ мәсилиләр үстидә сөһбәт елип баридикән.

Пакистан әмәлдариниң хитай зиярити, пакистандики бир йәр асти паһишиханисидин пакистандики талиплар тәрипидин гөрүгә елинған хитай аял қоюп берилип бир күндин кейин елип берилған.

Бирләшмә агентлиқиниң 25‏- июндики хәвиридә көрситилишичә, пакистан ички ишлар министириниң хитай зиярити йәнә, хәлқара кәчүрүм тәшкилати пакистандики бир қәбилә арисиға йошурунғанлиқи тәхмин етилгән 22 нәпәр уйғурни хитайға қайтуруп бәрмәслик тоғрисида пакистанға бесим ишләткәндин кейин елип берилған икән.

Пакистан ички ишлар министирлиқи баянатчиси җавәд иқбал чема, йәкшәнбә күни исламабатта, хитайниң техи мәзкур уйғур бөлгүнчиләрни қайтуруп беришни тәләп қилмиғанлиқини ейтқан.

Җавәд иқбал: "хитайлар техи биздин бирәр адәмни қайтуруп бериңлар демиди һәмдә исим тизимлики бәрмиди" деди.

У йәнә, әрәб, афған вә башқа оттура асиялиқ қораллиқ күчләр паалийәт елип бериватқан пакистандики қәбилә районида, уйғурларниң бар ‏- йоқлуқи һәққидә ениқ мәлумат йоқлуқиниму билдүрди.

Җавәд иқбал йәнә, пакистанда қолға чүшкән һәрқандақ чәтәлликниң өз дөләтлиригә қайтурулидиғанлиқини, әмма уйғурларниң хитайға өткүзүп берилишидин бихәвәр икәнликиниму тәкитлиди. (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт