Pakistanning yuqiri derijilik emeldari térrorluqqa qarshi söhbet ötküzüsh üchün xitaygha keldi


2007-06-25
Share

Kishilik hoquq teshkilatliri islam'abad hökümitige atalmish térror gumandarlirini xitaygha qayturup bermeslik toghrisida bésim qilip uzun ötmey, 25- iyun düshenbe küni pakistanning yuqiri derijilik dölet emeldari, xitay bilen térrorluqqa qarshi turush hemkarliqini yenimu kücheytish üchün béyjinggha yétip keldi.

Pakistan ichki ishlar ministiri aftabxan shérpa düshenbe küni etigende béyjinggha yétip kelgen bolup, shinxu'a agéntliqi bu heqte bergen xewerde körsitishiche, u, xitay jama'et xewpsizlik ministiri ju yünkang we bashqa xewpsizlik emeldarliri bilen körüshidiken. Melum bolushiche, ikki terep térrorluqqa qarshi turushtiki hemkarliqini kücheytish we pakistanda yashap, xizmet qiliwatqan xitay puqralirining bixeterliki qatarliq mesililer üstide söhbet élip baridiken.

Pakistan emeldarining xitay ziyariti, pakistandiki bir yer asti pahishixanisidin pakistandiki taliplar teripidin görüge élin'ghan xitay ayal qoyup bérilip bir kündin kéyin élip bérilghan.

Birleshme agéntliqining 25‏- iyundiki xewiride körsitilishiche, pakistan ichki ishlar ministirining xitay ziyariti yene, xelq'ara kechürüm teshkilati pakistandiki bir qebile arisigha yoshurun'ghanliqi texmin étilgen 22 neper Uyghurni xitaygha qayturup bermeslik toghrisida pakistan'gha bésim ishletkendin kéyin élip bérilghan iken.

Pakistan ichki ishlar ministirliqi bayanatchisi jawed iqbal chéma, yekshenbe küni islam'abatta, xitayning téxi mezkur Uyghur bölgünchilerni qayturup bérishni telep qilmighanliqini éytqan.

Jawed iqbal: "xitaylar téxi bizdin birer ademni qayturup béringlar démidi hemde isim tizimliki bermidi" dédi.

U yene, ereb, afghan we bashqa ottura asiyaliq qoralliq küchler pa'aliyet élip bériwatqan pakistandiki qebile rayonida, Uyghurlarning bar ‏- yoqluqi heqqide éniq melumat yoqluqinimu bildürdi.

Jawed iqbal yene, pakistanda qolgha chüshken herqandaq chet'ellikning öz döletlirige qayturulidighanliqini, emma Uyghurlarning xitaygha ötküzüp bérilishidin bixewer ikenlikinimu tekitlidi. (Jüme)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet