Qizil meschit weqesi xitay - pakistan munasiwitige zerbe bergen

Pakistandiki"kündilik waqti" gézitining jüme künki sanidin ashkarilinishiche, pakistan ichki ishlar ministiri aptap xan sherponing xitay ziyaritide, xitay j x ministiri jaw yungkang pakstan paytexti islam'abadtiki qizil meschit taliplirining xitay pahishixanisigha hujum qilip, 6 xitayni görüge éliwélish weqesini otturigha qoyghan we aptap xan sherpodin pakistandiki xitaylarning bixeterlikige kapaletlik qilishni telep qilghan.

" Kündilik waqti" géziti, xitay j x ministirining qizil meschit taliplirini " térrorchilar "dep atighanliqini we pakistan hökümitidin bu "jinayetchiler " ni jazalashni telep qilghanliqini yazdi. Xewerde eskertishiche, aptap xan sherpo "pakistan,xitay puqraliri we xitay organlirining bixeterliki üchün téximu jiddiy tedbir alidu " dep wede bergen.

Lékin xewerde, "ichki ishlar rministirimizning bu mesilide téximu jiddiy tedbir alalmaydighanliqi uninggha ayan idi " deydu. Chünki pakistan hökümiti, burun qebililer rayonida bir xitay inzhénérni görüge tutuwalghan abdulla mes'udni hazirghiche tutalmighan we pakistan xitayni qedinas dost, dep hésablisimu, lékin balujistan ölkiside xitay inzhénérlirini öltürüsh weqesi yüz bergen.

"Kündilik waqti" géziti yene, prézidént musherrefning qebililer rayoni xitayning gherbiy ölkisidiki Uyghur "térrorchilar"gha bash panah boluwatqanliqini tekitlishige qarimay, pakistandiki öktichi siyasetchilerning buni qet'iy ret qiliwatqanliqini shundaqla amérika Uyghur jem'iyiti 2001 - yili musherrefning pakistan lagiridiki 19 neper Uyghurni yoqatqanliqi we Uyghurlarni xitaygha ötküzüp bergenlikige narazi bolup xet yazghanliqini ashkarilidi. (Erkin)