Dunya ayallar putbol longqisi xitayning shangxey shehiride bashlandi

10- Séntebir düshenbe küni, 2007 - yilliq dunya ayallar putbol longqisi xitayning shangxey shehiride bashlan'ghan bolup, tunji meydan musabiqe a guruppa boyiche, gérmaniye bilen argéntina komandisi arisida élip bérildi. Melum bolushiche, gérmaniye komandisi nölge qarshi 11 netije bilen argéntina komandisini yéngip, dunya ayallar putbol longqisi tarixidiki alahide nomur perqi rékortini yaratti.

Bu nöwetlik dunya aylar putbol longqisi musabiqisige, jem'iy, amérika, kanda, en'gliye, gérmaniye, awstraliye, yaponiye, shwétsiye, yéngi zéllandiye, daniye, norwégiye,, braziliye, argéntina, gana, nigériye, xitay we shimaliy koréye qatarliq döletlerdin kelgen 16 komanda qatnishidu.

Dunya buyiche 11- orunda turidighan xitay ayallar komandisi bu nöwetlik musabiqide öz ornini östürüshni arzu qilidighan bolup, charshenbe küni xitay komandisi d guruppilar buyiche daniye komandisi bilen musabiqilishidu.

Kéler yili xitayda ötküzülidighan 2008- yilliq béyjing olimpiki munasiwiti bilen, xitay hökümiti ayallar komandisidin zor ümid kütidighan bolsimu, emma sabiq xitay ayallar komanda ezalirining bahasigha qarighanda, xitay komandisi bu nöwet anche yuqiri netijige érishelmesliki mumkin iken.

Emma , sabiq hujumchi sun wénning éytqanlirigha qarighanda, xitay ayallar komandisida ottura meydanda hujum teshkilligüchiler ajiz iken. Uningdin bashqa, sabiq waratar gaw xungning bildürüshiche, uning xitay komandisining bu nöwetlik putbol musabiqide alahide netijige ériship kételishige ümidi zor emes bolup, u shinxu'a agéntliqigha munularni bildürgen: "xitay ayallar komandisi serxil komanda emes. Jismaniy jehettin ular gérmaniye komandisigha, téxnika jehette braziliye komandisigha yetmeydu. Xitay komandisi alahidiliki yoq adettiki bir komandigha aylinip qaldi. " (Jüme)