Хитай дөләт рәиси қазақистан зияритини башлиди

Җүмә күни, русийә президенти владимир путин билән бирликтә, шаңхәй һәмкарлиқ тәшкилатиниң русийиниң чилябинсң районида елип барған һәрбий маневирни күзәткән хитай дөләт рәиси хуҗинтав, қазақистан зияритини башлиди.

Бүгүн қазақистанниң пайтәхти астана шәһиридә, қазақистан президенти нурсултан нәзәрбайиф билән учрашқан хитай дөләт рәиси ху җинтав, бу қетмқи зияритиниң хитай-қазақистан оттурисидики достлуқ вә һәмкарлиқини техиму күчәйтишни мәқсәт қилидиғанлиқини билдүрди.

Хитай дөләт рәиси ху җинтав ниң зиярити җәрянида қазақистан билән хитай оттурисида 9 муһим келишим имзалинидикән.

Қазақистан президенти нур султан нәзәрбайиф, ху җинтав билән учришиши җәрянида бәргән баянатида, қазақистанниң хитай вә русийә билән мунасивити, қазақистан мустәқиллиқи вә турақлиқиниң капалити һесаблиниду, деди. У шундақла қазақистан һөкүмитиниң, қазақистанда хитайниң тупрақ пүтүнлүкигә тәһдит қилидиған һечқандақ паалийәткә йол қоймайдиғанлиқини вә хитайдинму охшаш позитсийидә болушини үмид қилидиғанлиқини билдүрди.

Йеқинқи йиллардин бери, хитай билән қазақистанниң иқтсадий мунасивәтлири тез тәрәққий қиливатқан болуп, өткән йили икки дөләт оттурисидики тиҗарәт һәҗими 8 милярд 360 милйон долларға йәткән.

Хитай дөләт рәиси хуҗинтав ниң қазақистан зиярити, қазақистанда парламент сайлими елип бериливатқан бир мәзгилгә тоғра кәлди. Сиясий мулаһизичиләр шәнбә күни қазақситанда елип берилған парламент сайлимини, президент нәзәрбайифниң қазақистанда демократик бир җәмийәт қуруш ирадисиниң бар яки йоқлиқини көрситидиған муһим бир синақ дәп қаримақта. (Өмәр қанат)