" Talibanlar xitayning qorallirini ishlitiwatidu"

Xewerlerge qarighanda , en'giliye emeldarliri talibanlarning xitayda yasalghan qorallar bilen afghanistandiki en'giliye we ittipaqdash döletler qisimlirigha hujum qiliwatqanliqini ilgiri sürüp, xitay da'iriliri bilen bolghan mexpiy söhbette bu mesilini otturigha qoyghan we xitayning munasiwetlik organliri bolsa weqeni tekshürüshke wede bergen.

Afghanistandiki en'gliye we amérika qisimliri yéqindin béri talibanlar bilen élip barghan bir qanche qétimliq toqunushlardin kéyin , talibanlar jeng meydanigha tashlap ketken qorallarning xitayda yasalghanliqini bayqighan. Bu en'giliye hökümitining talibanlarni xitayda yasalghan qorallar bilen qorallandurush mesilisini tunji qétim xitay hökümiti bilen bolghan söhbette otturigha qoyushi we xitay da'irilirige naraziliq bildürüshi bolup hésablinidu. En'giliyining bir emeldari yéqinda xitay tashqi ishlar ministirliqi bilen ötküzgen bir söhbette en'giliyining bu mesilige diqqet qiliwatqanliqini otturigha qoyghan.

Xitay tashqi ishlar ministirliqi xitayning qoral - yaraqlar éksportida xitay qanunliri we xelq'ara ehdinamilargha qet'iy boysunuwatqanliqini tekitlep keldi. Talibanlar yéqindin béri qolidiki qorallarning nahayiti serxilliqini köz - köz qilip kéliwatqan bolsimu, lékin ular bu qorallarning qeyerdin kelgenlikini ashkarilashni ret qilmaqta idi. Bezi afghanistan emeldarliri, talibanlarning qolida xitayda yasalghan nazuk téxnikiliq qorallarning barliqini, bu qorallar yerdin hawagha qoyup bérilidighan bashqurulidighan bomba, zembirek, rakita we bomba zapchaslirini öz ichige alidighanliqini bildürgen.

B b s ning bu heqtiki xewiride," pakistandiki qoralliq unsurlarni herbiy yaraqlar bilen teminlesh xitay üchünmu yaxshi bolmasliqi mumkin. Chünki yéqinqi bir qanche yildin béri pakistandiki xitay ishchilar pakistan herbiy da'irilirining qebililer rayonidiki 'shinjangliqlar" ni qoghlap chiqarghanliqidin öch alidighan nishan bolup keldi" dep yazdi. (Gülchéhre)