Rusiye bilen xitay alahide saqchi qisimliri birleshme manéwir ötküzmekchi

Rusiye xewer agéntliqlirining tarqatqan xewiridin melum bolushiche, rusiye ichki ishlar alahide qisimliri bilen xitay alahide qoralliq saqchi qisimliri 6 - séntebirde moskwa etrapida birleshme manéwir ötküzidu .

Bu manéwir ötken ay béshkekte ötküzülgen shangxey hemkarliq yighinida ikki dölet emeldarlirining kélishimige asasen élip bérilmaqchi bolup , " 7 hemkarliq " dep nam bérilgen bu manéwir ikki terepning térrorchiliqqa qarshi ortaq jeng qilish iqtidarini ashurushni meqset qilghan bolup , rusiye gézitining xewiride körsitishiche, xitay bu manéwirgha " qar yilpizi " namidiki qoralliq alahide saqchi qismidin jem'iy yüzge yéqin qoralliq saqchini 2 - séntebir mexsus herbiy ayropilan bilen moskwagha élip kelgen.

Béyjing we moskwa ikki terep qoralliq alahide saqchi qisimliri öz ‏- ara qoral ‏- yaraqlirini közdin kechürgen, xitay bu manéwirda alahide yuqiri téxnikiliq qorallirini namayan qilghan . Xewerdin melum bolushiche ,xitay ‏- rusiye qoralliq alahide saqchi qisimlirining bu birleshme manéwiri üch kün dawamlishidiken.

Buning aldida yeni shangxey hemkarliq teshkilatining "tinchliq burchi 2007" namliq herbiy manéwiri9 - awghust bashlinip , 17- awghust rusiyining chélyabinski oblasti tewesidiki chébarkul meshiq meydanida ayaghlashqan idi. Mezkur manéwirning axirqi künidiki meshiqni shangxey hemkarliq teshkilatigha eza döletlerning rehberliri közdin kechürgen. Rusiye prézidénti putin :" mezkur manéwirning bu rayonda yüz bergen herqandaq térrorluq heriketlirige birlikte qarshi turushta zor rol oynaydighanliqi" ni körsetken.

Dunya Uyghur qurultiyi qatarliq Uyghur teshkilatliri , shangxey hemkarliq teshkilati hemde ularning élip bériwatqan birleshme herbiy manéwirliri Uyghurlarni basturushini meqset qilghan dep körsetmekte hemde shangxey hemkarliq teshkilati, xitay hökümitige özining siyasiy, diplomatik we iqtisadi tesir küchidin paydilinip Uyghur öktichilerni Uyghur élide we ottura asiyada basturushqa yol berdi dep eyiblimekte. (Gülchéhre)