Хитай билән русийә тунҗи қетимлиқ бирләшмә һәрбий мәшқи өткүзмәкчи


2004-12-13
Share

Русийә дөләт мудапиә министири сергей иванов хитайни зиярәт қиливатқан мәзгилдә икки тәрәп 2005 - йили тунҗи қетимлиқ бирләшмә һәрбий мәшқи өткүзүшни қарар қилди.

Америка бирләшмә ахбарат агентлиқиниң хәвиригә қариғанда, бирләшмә һәрбий мәшқниң хитай территорийисидә өткүзилидиғанлиқи билдүрүлгән болсиму, әмма хитайниң қайси йеридә вә қачан елип берилидиғанлиқи тәпсилий көрситилмигән.

Хитай дөләт рәиси ху җинтав дүшәнбә күни сергей ивановниң зияритини қобул қилип, русийиниң һәр йили хитайға сетип беридиған қораллириниң миқдарини техиму көпәйтиш һәққидә сөһбәтләшти.

Ху җинтав сергей ивановға қилған сөзидә, "биз районниң вә хәлқараниң тинчлиқини қоғдаш үчүн икки дөләтниң стратегийилик һәмкарлиқ мунасивитини техиму тәрәққий қилдурушни халаймиз" дәп билдүрди.

1989 - Йилидики тйәнәнмен оқуғучилар вәқәсидин кейин, америка вә явропа бирлики хитайға қорал сетип беришни чәклигән иди. Әмма буниң әксичә русийә изчил түрдә хитайға еғир типтики қоралларни сетип кәлди.

Русийә дөләт мудапиә министири сергей иванов дүшәнбә күни йәнә хитай дөләт мудапиә министири сав гуаңчвән вә муавин рәис го бошйоң қатарлиқлар билән көрүшти. (Пәридә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт