رۇسىيە باش مىنىستىرىنىڭ خىتاي زىيارىتىدە ئېنىرگىيە ھەمكارلىقى ئىلگىرى سۈرۈلدى


2006-11-09
Share

رۇسىيە باش مىنىستىرى مىخايىل يېفىموۋىچ فرادكوۋ ، بېيجىڭدا ئېلىپ بارىدىغان ئىككى كۈنلۈك زىيارىتىنى باشلىۋەتتى. بۇ قېتىمقى زىيارەتتە ئىككى تەرەپنىڭ ئېنېرگىيە ساھەسىدىكى مۇناسىۋىتىنى كۈچەيتىش ئاساسلىق تېما ھېسابلىنىدىكەن.

فرادكوۋ پەيشەنبە كۈنى، بېيجىڭغا يېتىپ كېلىپ، ئېنېرگىيە ھەمكارلىقىنى ئۆز ئىچىگە ئالغان ھەمكارلىق ھۆججەتلىرىگە قول قويغان. فرادكوۋ بۇ قېتىمقى زىيارىتىدە خىتاي دۆلەت رەئىسى خۇ جىنتاۋ ۋە خىتاي باش مىنىستىرى ۋىن جياباۋلار بىلەن كۆرۈشىدىكەن.

شىنخۇا ئاگېنتلىقىنىڭ خەۋىرىگە قارىغاندا، خىتاي بىلەن رۇسىيە ئىككى تەرەپ، 8 تۈرلۈك ھەمكارلىق كېلىشىمنامىسىگە قول قويغان بولۇپ، خىتاي تەرەپ سالغان مەبلەغنىڭ ئومۇمىي قىممىتى 80 مىليارد ئامېرىكا دوللىرىغا يېتىدىكەن.

بۇ ئارىدا رۇسىيە مەتبۇئاتلىرى، رۇسىيە بىرلىك ئېلېكتىر شىركىتىنىڭ باياناتىنى ئېلان قىلىپ، فرادكوۋ خىتاينى زىيارەت قىلغان مەزگىلدە ، مەزكۈر شىركەتنىڭ، خىتاينىڭ دۆلەت ئېلېكتىر تورى شىركىتى بىلەن رۇسىيىنىڭ خىتايغا ئېلېكتىر ئېنېرگىيىسى ئېكىسپورت قىلىشقا ئائىت كېلىشىمگە قول قويغانلىقىنى بىلدۈردى.

كۆزەتكۈچىلەرنىڭ بىلدۈرۈشىچە، رۇسىيە باش مىنىستىرىنىڭ بۇ قېتىمقى زىيارىتى، رۇسىيە بىلەن خىتاينىڭ ئېنېرگىيىنى ئاساس قىلغان، ئىككى تەرەپنىڭ ئىقتىساد ، تېخنىكا ۋە مەدەنيەت ساھەلىرى بۇيىچە كەڭ كۆلەمدە ھەمكارلىق ئورنىتىشنى ئاساسىي مەقسەت قىلىدىكەن. (ئەقىدە)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت