Сәуди әрәбистан падишаһи хитайни зиярәт қилиду

Сәуди әрәбистан падишаһи абдулла келәр һәптә хитайни зиярәт қилиду. Хитай ташқий ишлар министирлиқиниң ашкарилишичә, тәрәпләр сәуди падишаһиниң зиярити җәрянида нефит вә ениргийә бихәтәрлики қатарлиқ мәсилиләр бойичә музакирә елип баридикән. Бу сәуди әрәбистан падишаһиниң 1990 - йили сәуди - хитай дипломатик мунасивәт орнатқандин бери тунҗи қетим хитайни зиярәт қилиши болуп қалғуси.

Хитай ташқий ишлар министирлиқи баянатчиси куң чүәнниң сәйшәнбә күни мухбирларға тәкитлишичә, падишаһ абдулла хитай дөләт рәиси ху җинтав қатарлиқ кишиләр билән сөһбәт елип бариду.

Сәуди әрәбистан нефит министири наимниң зиярити 22 - январда елип берилидикән. Әмма куң чүән , наимниң падишаһ абдуллаға һәмра болуп келидиған -кәлмәйдиғанлиқини билмәймән, дәйду. У, "ениргийә бихәтәрлики вә нефит мәсилисидә икки тәрәпкә мәнпәәт йәткүзидиған музакириләр елип берилидиғанлиқиға ишинимән" деди.

Хитай дуня бойичә америкидин қалса 2 - чоң нефит истимал дөлити. Сәуди әрәбистан - хитай сода мунасвити йеқинқи йиллардин бери тез көпәймәктә. Куң чүән, 2005 - йилниң дәсләпки 11 ейида сәуди - хитай сода һәҗими 14 милярд долларға йәткәнликини билдүргән. Сәуди ички кабинти йеқинда нефит министири наимға хитай билән бир қатар келишимләр имзалаш һоқуқи бәрди. (Әркин)