Amérika awam palatasi ezaliri amérika hökümitining teywenning b d t gha eza bolup kirishige qarshi chiqishini eyiblidi


2007-12-21
Share

19 ‏- Dékabir amérika awam palatasi tashqi ishlar komitéti ezaliridin dana rohrabachér we tom tanchrédolar amérika tashqi ishlar ministiri kandiliza raysqa xet yollap, amérika hökümitining teywenning birleshken döletler teshkilatigha eza bolup kirish omumxeliq ray sinash herikitini ochuq ‏- ashkara tenqid qilghanliqidin intayin ümidsizlen'genlikini bildürdi.

Teywen ijtima'iy munasiwetler jem'iyitining 20 ‏- dékabir xewer qilishiche, kandiliza raysqa yollan'ghan xette teywen xelqining öz teqdirini özi belgilesh hoquqigha ige ikenliki körsitilip: "teywen xelqi bizning hökümitimizning yaki xitay xelq jumhuriyitining we yaki bashqilarning tosqunluqisiz öz aldigha saylam élip bérish hoquqini qolgha keltürgen. Shunga biz ularning shundaq qilish hoquqini hörmet qilishimiz kérek," déyilgen.

Uningdin bashqa mezkur xette amérika hökümitining teywenning kéler yili martta birleshken döletler teshkilatigha eza bolup kirish omumxeliq ray sinash herikiti élip bérish pilanigha qarshiliq bildürgenliki qattiq eyibligen.

Xette, amérika hökümitimizning teywen mesilisidiki pozitsiyisini ipadilesh üchün bir- ikki qétimliq ochuq ‏- ashkara bayanat élan qilishining yéterlik ikenliki, buninggha qarshi turush üchün xitay tashqi ishlar ministirliqi ishletken atalghularni eynen ishlitip, hökümet xadimlirini teyinlep aylargha sozulghan eyiblesh herikiti élip bérishning bihajet ikenliki körsitilgen.

Teywen ijtima'iy munasiwetler jem'iyitining diréktori wén yenchén, bu ikki neper teywenni qizghin qollighuchilarning tashqi ishlar ministirigha yazghan xétide nurghunlighan teywenlikning we köpligen amérikiliqlarning oxshash tuyghusi eks ettürülgenlikini bildürdi we "amérikigha jaylashqan teywenning xelq'araliq démokratiyisini ilgiri sürüsh jem'iyiti bolush süpitimiz bilen biz amérika hökümitining teywenning birleshken döletler teshkilatigha kirish pilanigha qarshi chiqqanliqidin intayin qayghurduq we buruqtum bolduq," dédi.

U yene, amérika hökümiti iraq, bérma, rusiyide we dunyaning bashqa bulunglirida démokratiyini ilgiri sürüsh üchün tirishiwatqan peytte, hetta amérika prézidénti jorj bushmu xitay rehberlirige teywenning démokratiye endizisini ülge élish toghriliq teklip bériwatqan bir waqitta, amérika hökümitining teywenning birleshken döletler teshkilatigha eza bolup kirishige qarshi chiqishining intayin mesxirilik ish ikenlikini tekitlidi. (Jüme)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet