Yuqiri derijilik bir xitay emeldari teywen'ge jasusluq qilish sewebidin qolgha élindi

Xitay qatnash ministirliqi teywen ishliri ishxanisining sabiq mu'awin bashliqi li shén teywen'ge jasusluq qilish sewebidin xitayning chaghan bayrimi harpisida qolgha élin'ghan. Teywen "birleshme " gézitining eskertishiche, li shén teywen'ge jasusluq qilish sewebidin qolgha élin'ghan xitay hökümet emeldarliridin 3 ‏- kishi bolup, ularning ichide emili eng yuqiri kishi bolup hésablinidu.

Teywen metbu'atlirining bu heqtiki xewiride xitay dölet bixeterlik ministirliqining li chyendin gumanlinishqa bashlighanliqini we 2000 ‏- yildin bashlap uning izigha chüshkenlikini, chaghan bayrimi harpisida qolgha élin'ghanliqini yazdi. Li chyen 1990 ‏- yillarda xitay qatnash ministirliqi teywen ishxanisining mes'uli bolush süpitide xitay - teywen qatnash sahesidiki zatlar bilen yéqindin tonushatti. U hoquq tutqan mezgillerde xitayning chet'ellerdiki hawa yollar qatnishi we xitay - teywen arisida déngiz qatnishini yolgha qoyush xizmitige rehberlik qilghan hem bu jeryanda 3 qétim teywen'ge barghan idi. U 1999 ‏- yildin kéyin özining xususy igilikini tikleshke bashlap, xitay chong quruqluqidiki teywen mesililiride asasliq bilermenlerdin bolup qalghan idi.

Xitay da'iriliri buningdin burun chong quruqluqning teywen ishliri saheside xizmet qilidighan yuqiri derijilik emeldarlardin 2 kishini teywen'ge jasusluq qilish bilen qolgha alghan idi. Bu kishiler 1991 ‏- yili qolgha élin'ghan junggo teywenlik qérindashlar dostluq jem'iyiti teshwiqat bölümining bashliqi chu wéy we 2004 ‏- yili qolgha élin'ghan nenjing sheherlik teywen ishliri ishxanisining mes'uli jang jünninglarni öz ichige alidu. Li chyen bolsa xitayning teywen ishlirigha mes'ul organlarda ishlep jasusluq sewebidin qolgha élin'ghan 3 ‏- kishidur.

Yéqinqi 20 yildin béri xitay - teywen arisidiki soda we ammiwi alaqining küchiyishige qarimay,ikki qirghaqning jasusluq urushi toxtap qalmidi. (Erkin)