Xitay hindistandiki elchixanisining hujumgha uchrishini dalay lamagha artti

Xitay da'iriliri amérika dölet mejlisining dalay lamagha altun médal bermekchi bolghanliqini eyiblep bir kün ötkendin kéyin, jüme küni yene hindistandiki elchixanisining hujumgha uchrash weqesini dalay lama keltürüp chiqardi, dep eyiblidi.

Ötken charshenbe küni xitayning hindistandiki elchixanisi 30 dek tibetlik namayishchining hujumigha uchrap, bir qisim namayishchilar xitay elchixanisining derwaza we témigha " tibetke erkinlik" dégen qizil xetlerni yazghan we béyjing da'irilirining tibetke lama saylighanda choqum hökümetning testiqi élinishi kérek, dégen belgilimisige naraziliq bildürgen idi. Xitay tashqi ishlar ministirliqi jüme küni bayanat élan qilip, "dalay lama guruhi junggoning tibet aptonom rayonining muqimliqi we tereqqiyatigha buzghunchiliq, ighwagerchilik we awarichiliq peyda qilishta her bir pursettin paydilanmaqchi " dep körsetti.

Xitay da'iriliri yene, bu urunushning choqum meghlubiyetke uchraydighanliqini we hindistan terepning xitaygha qarshi heriketlerge yol qoymasliqini shundaqla weqe tughdurghuchilarni éghir jazalashni telep qildi. Xitay hökümiti buningdin burun amérika dölet mejlisining tibet rohani dahisi dalay lamagha altun médal bermekchi bolghanliqini eyibligen idi.

Dalay lamagha altun médal bérish murasimi 17 ‏- öktebirde amérika dölet mejlisi ötküzülidu. Peyshenbe küni dalay lama nyu york shehiridiki bir yighin zalida qollighuchilirigha söz qildi. Aqsarayning bayanatida eskertishiche, dalay lama washin'gton'gha kelse, prézidént bush uni aqsarayda qobul qilidiken. (Erkin)