Yaponiye bash weziri shinzo abé yasukuni buzrukgahini tawap qilmasliqi mumkin

Jüme küni yaponiye bash weziri shinzo abé kelgiliwatqan bahar bayrimi jeryanida yasukuni buzrukgahini tawap qilish qilmasliqi heqqide soralghan so'allarni jawabsiz qaldurghan. Melumatlargha qarighanda, u belkim xitay munasiwetlirini ilgiri sürüsh ishliri netijilen'giche, hich bolmighanda mushi'u yili iyun'ghiche mezkur büzrukgahini tawap qilmasliqi mumkin iken.

Bu heqtiki xewer xitay bash ministiri wén jiyabawning xitay ‏- yaponiye arisidiki soghuqchiliqni yumshitish mumkinchiliki tüsini alghan ziyariti ayaqliship bir heptidin kiyin otturigha chiqqan.

Birleshme agéntliqining 20 ‏- aprildiki xewiride kyoda axbarat agéntliqi bergen xewerdin neqil keltürüp éytishiche, kelgiliwatqan üch künlük bahar bayrimi jeryanida yaponiye bash weziri shinzo abé xitay bilen bolghan diplomatik wediliri seweblik yasukuni büzrukgahini tawap qilmasliqi mumkin iken.

Shu jay waqti jüme küni kechqurun, yaponiye bash weziri shinzo abé muxbirlargha, özining siyasiy köz qarishida ching turidighanliqini bildürüp, "u jayni tawap qilish dölitimiz üchün hayatini qurban qilghanlarning rohigha éhtiram bildürüsh üchün. Méningche, bu diplomatik we siyasiy mesile bolghachqa, mezkur jayni tawap qilishqa bérish‏ - barmasliqim üstide toxtalmaymen" dégen.

20 ‏- Esirning aldinqi yérimida, yasukuni büzrukgahi, tokyo we bashqa qoshna döletler arisida diplomatik munasiwetlerdiki halqiliq mesile bolup kelgen idi. Yaponiyining sabiq weziri junchiro ko'izumi yasukuni büzrukgahni tawap qilghanliqi üchün xitay uning bilen uchrishishni ret qilghan.

Yasukuni büzrükgahi 2.5 Milyon urush qurbanlirigha éhtiram bildürüsh üchün qurulghan bolup, yaponiye we chet'ellik tenqidchilerning qarishiche, mezkur jay yaponiye tajawuzchiliq tarixining simwoli iken. Burunqi xewerlerdin melum bolushiche, abé yaponiye ichki kabinétining bash katibi waqtida mezkur büzrukgahni mexpiy ziyaret qilghan iken. (Jüme)