Хитай һөкүмити уйғур елидә екологийилик тәкшүрүш елип бериватқан 4 нәпәр японийә алимиға җәриманә қойди

Хитай һөкүмити уйғур елидә екологийилик тәкшүрүш елип бериватқан 4 нәпәр японийә алимиға, уйғур елидә қанунсиз һалда хәритигә елиш вә тәкшүрүш паалийити билән шуғулланди, дәп 20 миң йүән җәриманә қойған.

Хитай хәлқ гезити 27 ‏- априлда бәргән хәвәрдә ашкарилишичә, японийилик хидехиро сома башлиқ 4 нәпәр хадим, японийә инсанийәт вә тәбиәт тәтқиқат институтиниң орунлаштуруши билән уйғур елидики туз көл ‏- ебнур көлиниң екологийилик вә муһит өзгириш әһвали һәққидә тәкшүрүш елип барған икән.

Хитайниң уйғур елидики өлчәш-сизиш идарисиниң башлиқи ли чүәнҗәнниң ейтишичә, бу 4 киши мәзкур җайда дунявий орун бәлгиләш системисини ишлитип өлчәш-сизиш мәшғулати билән шуғулланған. Хитай қануниға асасән мунасивәтлик даириләрниң рухситини алмиған асаста бундақ мәшғулат елип бериш қанунсиз икән.

Униң билдүрүшичә йәнә, мәзкур япон хадимларниң тәкшүрүш аппаратлири мусадирә қилинған. Кейин японийилик тәкшүргүчиләр өзлириниң хата қилғанлиқини, бундин кийин хитай қануниға риайә қилидиғанлиқини билдүрүшүп кәчүрүм сорашқан.

Өткән йили априлдиму хитай һөкүмити икки нәпәр японийилик тәкшүргүчини хотән районида тәкшүрүш елип барди дәп 80 миң йүән җәриманә қоюп чегиридин қоғлап чиқарған иди. (Җүмә)