Yaponiye yawropa ittipaqining xitaygha qoral - yaraq sétip bérishige qarshi turdi

Yaponiye bash ministiri shinzu abé, 8 dölet guruhining gérmaniyidiki bashliqlar yighini jeryanida fransiye prézidénti sarkoziy bilen körüshüp, yawropa ittipaqining xitaygha qoral - yaraqlar sétip bérishige qarshi ikenlikini yene tekitlidi. Yaponiyilik emeldarlar, abé 8 dölet guruhining yighini bashlinishtin burun 16 - may küni fransiyining prézidéntliq textige olturghan sorkoziy bilen ötküzgen tunji söhbitide, " yaponiye yawropa ittipaqi xitaygha qoyghan qoral - yaraq imbargosini bikar qilishigha qarshi turidu," dep agahlandurghanliqini bildürdi.

Sarkoziy bolsa söhbettin kéyin muxbirlargha bergen bayanatida abéning imbargoni bikar qilishqa qarshi chiqqanliqini biwasite tilgha almidi. U peqet, yaponiyiliklerning bu mesilidiki meydanini chüshünish nahayiti muhim," dep tekitligen. Yaponiye bilen amérika uzundin béri xitayning herbiy xam chotini yildin - yilgha köpeytiwatqanliqini tenqid qilipla qalmay, yawropa ittipaqining xitaygha qoyghan qoral - yaraqlar imbargosini bikar qilishqa qarshi turup kelmekte.

Fransiyining sarkoziydin burunqi prézidénti jak shirak, xitaygha qoyulghan imbargoni bikar qilishni eng aktip qollighuchilarning biri idi. Lékin amérika bilen yaponiye, imbargoni bikar qilish sherqiy asiyadiki herbiy küchler tengpungliqining buzulushini tézlitidu, dep qarshi chiqmaqta. Yawropa ittipaqi 1989 - yili xitay kompartiyisi tyen'enmén démokratiye herikitini basturghandin kéyin, xitaygha qoral-yaraq imbargosi qoyghan.(Erkin)