Xitay hökümiti yaponiyining sénkaku arilidiki mayakqa ige chiqqanliqini qayta eyiplidi

Xitay tashqi ishlar ministirliqi shenbe küni bayanat élan qilip, yaponiyining sénkaku taqim aralliridiki mayakqa ige chiqqanliqini qayta eyiplidi.

Fransiye axbarat agéntliqining xewirige qarighanda, xitay tashqi ishlar ministirliqi asiya bölümining emeldari bayanatida, "yaponiyining bu qilmishi, xitayning igilik hoquqigha dexli - teruz yetküzgenlik, buni hökümitimiz we xelqimiz qet'iy qubul qilmaydu" dégen. U yene, xitay hökümitining bu mesilide yaponiye terep bilen resmiy dewalishiwatqanliqini körsetken.

Yaponiye hökümiti ötken charshenbe küni sénkaku taqim aralliridiki yaponiye ongchi éqim pa'aliyetchiliri yasighan mezkur mayaqqa ige chiqqanliqini jakarlap, bundin kiyin bu mayakni yaponiye déngiz qirghiqi saqchi etriti bashquridighanliqini bildürgen . Xitay tashqi ishlar ministirliqining bayanatchisi kung chüen shu künila yaponiye hökümitining bu herikitini "inawetsiz" we "qanunsiz" dep jakarlighan idi.

Xewerge qarighanda, xitay bilen yaponiyining iqtisadi hemkarliqi éship bériwatqan bolsimu, biraq yaponiye bash ministirining urush qehrimanlar qewristanliqini yoqlishi we xitay yadro su asti paraxotining yaponiye déngiz térritoriyisige bösüp kirishi qatarliq weqeler sewebidin, ikki dölet munasiwiti yirik bolup kelmekte.

Yaponiye 1895 - yili ching sulalisini urushta meghlup qilip, sénkaku taqim arallirining yapuniyige tewe ikenlikini jakarlighan. 1970 - Yilliri bu arallarda néfit bayliqi bayqalghandin boyan, xitay bilen teywen her ikkilisila bu rayonning igilik hoquqini telep qilmaqta. (Arzu)