Хитай- японийә ташқи ишлар министири икки тәрәп ихтилабини музакирә қилди


2005.05.08
Share on WhatsApp
Share on WhatsApp

японийидә асия - яврупа дөләтлири ташқи ишлар министирлири йиғиниға қатнашқан хитай ташқи ишлар министири ли җавшиң билән японийә ташқи ишлар министири мачимура шәнбә күни кәчтә икки дөләт мунасивитини яхшилаш мәсилисини музакирә қилди.

Әнгилийә б б с радио -телвезийисиниң хәвиригә қариғанда, японийә ташқи ишлар министири мачимура, хитай һөкүмитидин өткән айда хитайда өткүзүлгән японийигә қарши намайишлар сәвәбидин әпу сорашни вә төләм төләшни тәләп қилған.

Өткән айда хитайниң һәр қайси чоң шәһәрлиридә, японийиниң талаш - тартиштики тарих дәрслик китабини тәстиқлиши вә японийиниң б д т бихәтәрлик кеңишигә даимий әза болуп киришигә қарши кәң көләмлик намайишлар йүз бәргән, шундақла зораванлиқ вәқәләрму садир болған . Намайишлар сәвәбидин хитай- японийә мунасивити интайин йирикләшкән иди.

Хитай ташқи ишлар министири ли җавшиң сөһбәттә гәрчә кәчүрүм соримиған болсиму, бирақ төләм төләш мәсилисидә йәнә давамлиқ музакирә қилишни халайдиғанлиқини билдүргән. Ли җавшиң йәнә японийә баш министири койзоминиң " уруш қәһриманлар қәбристанлиқи" ни зиярәт қилмаслиқини тәләп қилған. Мәзкур қәбристанлиққа иккинчи дуня урушидики уруш "җинайәтчилири" ниң җәсәт күлиму дәпнә қилинған иди.

Хәвәрдә ейтилишичә, икки дөләт ташқи ишлар министирлириниң шәнбә күнидики бу учришиши хитай- японийиниң мунасивитини яхшилашқа қарап йәниму тиришчанлиқ көрситиватқанлиқини ипадиси икән.

Бирақ бу арида, америка авази радиосиниң хәвәр қилишичә, японийә баш министири койзоми мувапиқ пурсәт тапса, бу йил " уруш қәһриманлар қәбристанлиқи" ни йәнә зиярәт қилишни ойлашмақта икән. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.