Хитай билән японийиниң тәбий газ сөһбити келишим һасил қилалмиди

Хитай билән японийиниң шәрқий җуңго деңизиниң игилик һоқуқи талаш - тартиштики районлирида тәбий газ қезиш мәсилиси бойичә дүшәнбә күни елип барған 4 - қетимлиқ сөһбити келишим һасил қилалмиди. Бәзи көзәткүчиләр, хитай - японийә мунасивитиниң начарлишип кәткәнлики сәвәбидин тәбий газ мәсилиниң тез һәл болмайдиғанлиқини билдүрмәктә.

японийиниң бейҗиңда турушлуқ әлчиханисиниң әскәртишичә, японийә тәрәп бу қетимқи сөһбәттә чегра пасилидики тәбий газ мәнбәлиридин тәң пайдилиниш тәклипигә хитай тәрәпниң қайтуридиған инкасини билмәкчи икән. Буниңдин бурун өткүзүлгән 3 қетимлиқ сөһбәт хитай - японийә оттурисидики 1931 - йилдин 1945 - йиллири арисида йүз бәргән тарихий көңүлсизликләр сәвәбидин нәтиҗә қазиналмиди.

японийә сөһбәт өмикиниң башлиқи кеничиро сасей, " биз өзимизниң мәйданини оттуриға қойдуқ, әмди хитайларниң бу мәсилидики пикирини аңлап бақмақчи " дәйду. Ройтерс ахбарат агентлиқиниң хәвәр қилишичә, хитайлар диявйүй тақим араллири дәйдиған, японийиликләр сенсако тақим араллири, дәп атайдиған талаш - тартиштики деңиз райониниң чегра пасилида тәбий газ мәнбәлирини тәң ечишқа қошулған болсиму, әмма тәрәпләр иқтисади районларниң чегра пасилини қәйәрдин айриш мәсилисидә пикир бирлики һасил қилалмиған.

японийә тәрәп хитай ширкәтлири тәбий газ қезиш мәшғулати елип бериватқан районлар японийиниң иқтисади райониға киридиғанлиқини билдүрмәктә. Илгири японийә хитайниң бу районлардики мәшғулати тоғрисида учур билән тәминләшни вә мәшғулатини тохтитишни тәләп қилған. Кеничиро сасейниң ахбарат саһәсигә ашкарилишичә, сөһбәт тәбий газ мәсилиси биләнла чәкләнмәслики мүмкин. (Әркин)