Bezi yawropa döletliri béyjing olimpikining échilish murasimini bayqut qilidighanliqini jakarlidi

28 - Mart jüme küni yawropa parlaméntigha eza döletlerning ministirliri slowéniyide bu yilliq béyjing olimpikini bayqut qilish mesiliside muhakime élip bérish üchün ikki künlük söhbetni bashlighan bolup, fransiye agéntliqida körsitilishiche, olimpikni bayqut qilish mesiliside ministirlarning meydani her xil bolghan.

Melum bolushiche, mezkur söhbet jeryanida eza döletlerning héchqaysi bu yilliq béyjing olimpikini pütünley bayqut qilish kéreklikini otturigha qoymighan bolsimu, emma yawropa ittipaqidiki köpinche döletler xitay yéqindin buyan tibette élip bériwatqan basturush heriketlirini ochuq ‏ - ashkara eyibligen.

Xewerde ashkarilinishiche, gerche yawropa ittipaqigha eza döletlerning beziliri olimpik échilish murasimigha qatnashmasliqning tibet mesilisi bilen munasiwetsiz ikenlikini körsetken bolsimu, emma yene bezi ittipaqdash döletlerning bu yil 8 - awghustta xitayda ötküzidighan 2008 - yilliq béyjing olimpikning échilish murasimini tibet mesilisi tüpeyli bayqut qilish mumkinchiliki yenila yuqiri iken.

Xewerde neqil qilinishche, gérmaniye tashqi ishlar ministiri frank walkér stéynmyér özining hemde bash ministiri an'géla mérkél xanimning hemde gérmaniye tenterbiye ministiri wolfgang shawbléningmu bu yilliq béyjing olimpikige qatnashmaydighanliqini, emma buning tibet mesilisi alaqidar emeslikini bildürgen.

Uningdin bashqa,sherqi yawropa elliridin chéx prézidénti waklaw laws, éstoniye prézidénti tomas hendrik ilwes, polsha bash ministiri donal tusk qatarliqlarning hemmisi bu yilliq béyjing olimpikining échilish murasimini bayqut qilidighanliqini jakarlighan.

Emma en'giliye bash ministiri gordon brown olimpikni bayqut qilmaydighanliqini uqturghan bolsa, fransiye prézidénti nikolas sarkozy olimpikni bayqut qilish mesiliside éniq meydanini ipadilimigen. (Jüme)