Xristi'an bolghan afghan puqrasi qoyup bérildi

Yekshenbe küni afghanistan, xristi'an dinini qobul qilghan abdul raxman ismlik afghan puqrasi üstidin échilghan sotni bikar qildi. Bezi xewerlerge qarighanda, abdul raxman alliqachan qoyup bérilgen. Emma amérika birleshme agéntliqining bildürüshiche, afghanistan hökümet xadimliri téxi uning qoyup bérilgenlikini éniqlimighan.

Lékin düshenbe küni birleshken döletler teshkilati abdul raxmanning bashqa bir dölettin siyasiy panahliq tiligenlikini bildürdi.

Abdul raxman ötken ay afghanistan saqchiliri teripidin qolghan élin'ghan we ötken hepte uning üstidin 16 yil burun xiristyan dinini qobul qilghanliqi üchün sot échilghan idi. Afghanistan qanunlirigha asasen u, ölüm jazasigha höküm qilinishi mumkin idi.

Abdul raxmanning xristi'an dinini qobul qilghanliqi üchün sotqa tartilishi we uni ölüm jazasi bilen tehdit qilinishi amérika qatarliq gherb döletliride qattiq naraziliq dolquni qozghidi. Xewerlerge qarighanda hetta amérikining herbiy yardimi bilen afghanistandiki hakimiyiti gumran qilin'ghan radikal diniy heriket hésablan'ghan talibanlar dewridimu yüz bermigen bir weqening, amérikining herbiy yardimi bilen hakimiyet béshigha kelgen bir hakimiyet dewride yüz bérishi kishilerni heyran qaldurghan.

Amérika prézidénti jurj bush we tashqi ishlar ministiri kondaliza rayis, bu mesilige biwaste ariliship, afghanistan prézidénti hamid karzaydin mesilini tézdin bir terep qilishini telep qilghan. Amérika we bashqa gherb döletlirining bésimi netijisde afghanistan soti yekshenbe küni abdul raxmanni sotqa tartish üchün yéterlik ispat yoq dep, uning üstidin échilghan sotni bikar qildi.

Lékin xewerlerge qarighanda, afghansitanda yüzligen diniy zat sotning qararigha naraziliq bildürüsh üchün namayish ötküzgen. (Qanat)