Шималий корийә ядро қораллар сөһбити қайта башланди

Шималий корийә ядро қораллар мәсилиси бойичә 6 тәрәп сөһбити сәйшәнбә күни бейҗиңда қайта әслигә кәлди. Тәрәпләр сәйшәнбә күнгичә илгири - кейин болуп бейҗиңға йетип кәлди.

Хитай ташқи ишлар министирлиқи сөһбәтниң башлиниш вақтини елан қилмиған. Әмма җәнубий корийә бирләшмә ахбарат агентлиқи сөһбәтниң сәйшәнбә күни чүштин кейин башлинидиғанлиқини билдүрди.

Америка билән шималий корийә ядро қораллардин ваз кечиш мәсилисидә һазирға қәдәр пикир бирликигә келәлмиди. Америка шималий корийиниң ядро әслиһәләрдин үзүл- кесил ваз кечишини тәләп қилмақта. Әмма шималий корийә ядро әслиһәлирини тинч йолларға ишлитиш һоқуқини сақлап қалидиғанлиқида чиң туруп кәлди.

Көзәткүчиләр, бу қетимқи сөһбәтни әмилий илгирләшкә еришиш яки еришәлмәсликдики һәл қилғуч учришиш, дәп көрсәтмәктә. Шималий корийә ядро қораллар пилани бойичә бейҗиңда өткүзүлгән 4 - қетимқи сөһбәт, нәтиҗигә еришәлмигәндин кейин, сөһбәткә бир мәзгил ара берилгән иди. Бу җәрянда америка билән шималий корийә һәр хил қаналлар арқилиқ мәхпий учрушушларни елип барди.

Америка, японийә, русийә, хитай, җәнубий корийә қатарлиқ дөләтләр шималий корийә мәсилисини тинч йол билән һәл қилиш үчүн 2003 - вә 2004 - йиллири 3 қетим сөһбәт елип барған. (Әркин)