Түрмидики хитай шаириниң аниси Yahoo ширкити үстидин әрз қилидиғанлиқини җакарлиди


2007.06.15
Share on WhatsApp
Share on WhatsApp

Хунән"һазирқи заман сода гезити"ниң муһәррири, түрмидики хитай шаири ший тавниң аниси гав чиншиң пәйшәнбә күни америка пайтәхти вашингтонға йетип кәлгәндин кейин, оғлиниң қолға елиниши вә 10 йиллиқ қамақ җазасиға һөкүм қилишиға сәвәбчи болған Yahoo интернет ширкити үстидин америка сот мәһкимисигә әрз қилидиғанлиқини җакарлиди.

Ший тав 2005 ‏- йили хитай һөкүмитиниң тйәнәнмен вәқәсини хатирилигән тор бәтләрни чәкләш тоғрисидики бир һөҗҗитини интернеттә елан қилғандин кейин, хитай һөкүмити уни дөләт мәхпийәтликини ашкарилаш җинайити билән қолға елип, 10 йиллиқ қамақ җазасиға һөкүм қилған иди. Хәвәрләргә қариғанда Yahoo интернет ширкити хитай һөкүмитини ший тавниң интернеткә тизимлатқан шәхси учури билән тәминлигән вә униң қолға елинишиға сәвәбчи болған.

Гав чиншиң, җүмә күни вакаләтчи адвокати вә чегрисиз мухбирлар тәшкилатиниң вашингтондики вәкили билән көрүшкәндин кейин мухбирларни күтүвелип, ший тавниң дилоси "әмди йәккә- йиганә бир дило әмәс, хәлқарада нурғун кишиләр диққәт қиливатқан дило" болуп қалғанлиқини билдүрди.

Гав чиншиң әсли җәнубий африқиға берип, оғлиға вакалитән униңға берилгән бир мукапатни алмақчи иди. Лекин у җәнубий африқидин қайтиш сәпиридә америкиға кәлди. Униң әскәртишичә, бу сәпиридә у адвокат билән әрз мәслисидә тохтам түзмәкчи икән. Гав чиншиң шу күни америка дөләт мәҗлисидә йеңи җерсийлик җумһурийәтчи авам палата әзаси кристофир симис билән көрүшкән. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.