Amérika fédéral soti yaxu intérnét shirkiti üstidin ispat yighini achmaqchi

Amérikining shimaliy kaliforniye shitati oklan shehiridiki amérika fédéral soti 11 - ayning 1- küni yaxu intérnét shirkitining xitayni uchur bilen teminlesh délosi heqqide mexsus ispat bérish yighini achmaqchi.

Mezkür ispat anglash yighinida, amérika dunya insan heqliri wekili wang shawning qatarliqlarning yaxu shirkitining xitay da'irilirini shi taw, wang shawning qatarliq tor abontlirining shexsi matériyali bilen teminligenliki mesilisi üstidin sun'ghan erzi heqqide ispat béridu. Yaxu shirkiti ilgiri xitayni yaxu intérnét abontliri bolghan wang shawning we shi tawlarning shexsi matériyali bilen teminligen bolup, yaxu teminligen uchurgha asasen xitay da'iriliri 2003- yili wang shawningni 10 yilliq qamaq jazasigha höküm qilghan. Shi taw 2004 ‏- yili qolgha élinip 2005 - yili 10 yilliq qamaq jazasigha höküm qilin'ghan.

Bu yil ikkinchi ayda yaxu shirkiti fédéral sotida ispat bérip " shirkitimiz xitayning qanunini hörmet qilghanliqi üchünla ularni matériyal bilen teminligen, emma hökümetning bu shexsi matériyallarni néme üchün ishlitidighanliqidin xewirimiz yoq " dep bildürgen. Hemde, 8 ‏- ayda erzni bikar qilish telipini qoyghan. Buninggha " shi taw qatarliqlarni türmige solighan yaxu shirkiti emes xitay hökümiti, fédéral sotining xitay hökümitini sotqa tartish hoqoqi yoq " dep bahane körsetken.

Erz sun'ghuchi terepning adwokatining amérika awazi radi'osi muxbirigha bildürüshiche, yaxu intérnét shirkitining uchur bilen teminlishi arqisida ilgiri ‏- axiri bolup töt kishi xitayning ziyankeshlikige uchrighan.

Fédéral sotining ispat bérish yighinida yaxu shirkiti xitay hökümet organliri bilen bolghan alaqisi heqqide matériyal tapshuridu, buningdin bashqa yene, amérika dölet mejlisi diplomatiye komitéti hey'et ezaliri 11 ‏- ayning 6 ‏- küni yaxu shirkitining xitayni uchur bilen teminlesh mesilisi heqqide tapshurghan matériyalliri üstidin tekshürüsh élip baridu. (Gülchéhre)