Америка дөләт мәҗлиси яң җйәнлини әсләш йиғини өткүзди


2005.04.27

Америка дөләт мәҗлиси сәйшәнбә күни хитай демократчиси яң җйәнлиниң хитай һөкүмити тәрипидин қолға елинғанлиқиниң 3 йиллиқи мунасивити билән, уни хатириләш йиғини өткүзди.

Йиғинға қатнашқан америка дөләт мәҗлисиниң авам палата әзаси барний фрәнк бу мунасивәт билән сөз қилип, хитай һөкүмитиниң яң җйәнлини қолға елиши, һечқандақ асаси болмиған "вәһшиянә бир һәрикәт" дәп билдүрди.

У сөзидә йәнә, "хитай һөкүмити чоқум шуни чүшүнүп йетиши керәкки, улар яң җйәнлигә давамлиқ қопал муамилә қилип, асасий қанунни һөрмәт қилмайдикән, улар һәргизму тама қилип келиватқан хәлқара җамаитиниң һөрмитигә еришәлмәйду" деди.

Америка дөләт мәҗлисидики авам вә кеңәш палатаси һәр иккилиси бирликтә хитай һөкүмитидин яң җйәнлини қоюп беришни тәләп қилиш тоғрисида қарар мақуллиған иди. Шундақла бирләшкән дөләтләр тәшкилатиму яң җйәнлиниң қолға елинишиниң хәлқара қанунға хилап қилмиш икәнликини әскәрткән.

яң җйәнли 1989 - йилидики тйәнәнмен оқуғучилар һәрикитигә қатнашқан оқуғучилар рәһбәрлириниң бир болуп, мәзкур һәрикәт хитай һөкүмити тәрипидин қанлиқ бастурулғандин кейин, у америкиға чиқип кәткән иди. У америкидики мәзгилидә атақлиқ харворд университетиниң тәтқиқатчиси болуп ишлигән. У 2004 - йили 4 - айда хитайға барғанда, хитай һөкүмити уни ишпийонлуқ паалийити билән шоғулланған вә хитайға қанунсиз киргән дегән җинайәт билән қолға елип, 5 йиллиқ түрмигә ташлиған иди. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.