Америка дөләт мәҗлиси хитайдин яң җйәнлини қоюп беришни тәләп қилди

Америка дөләт мәҗлиси әзалири, хитай дөләт рәиси ху җинтавниң америка зиярити һарписида, хитайда түрмидә йетиватқан демократийә паалийәтчиси яң җйәнли вә хитай һөкүмити тәрипидин баҗ оғрилиди дәп әйиблинип қолға елинған, карханичи җу дишавниң қоюп берилиши үчүн һәрикәт башлиди.

Америка дөләт мәҗлисиниң нурғунлиған әзалири, яң җйәнли вә җу дишавниң қоюп берилишини тәләп қилип америка президенти җурҗ бушқа хәт язған.

Хитай һөкүмити давамлиқ хитай рәһбәрлириниң америка зиярити һарписида, даңлиқ сиясий мәһбусларни қоюп бәргән иди. Ху җинтавниң бу қетимқи зиярити униң хитай дөләт рәиси вәзиписини тапшуруп алғандин кейин америкиға қилған тунҗи рәсмий зиярити һесаблиниду.

Хәвәрләргә қариғанда, өткән һәптә америка дөләт мәҗлисиниң 119 әзаси америка президенти җурҗ бушқа хәт йезип, униңдин ху җинтав билән көрүшкинидә америка пуқраси болған хитай демократийә паалийәтчиси яң җйәнли мәсилисини оттуриға қоюшини тәләп қилған. яң җйәнли 2002‏- йили хитайға қанунсиз киргән дәп қолға илинған.

Хитай ташқи ишлар минстирлиқи өткән һәптә яң җйәнли тоғрисида баянат елан қилип, униң мәсилисиниң қанунға асасән бир тәрәп қилинидиғанлиқини билдүрди. Лекин қандақ һәл қилинидиғанлиқи һәққидә бир немә демиди. (Қанат)