Yaponiye : xitay herbiy sélinma jehette téximu ochuq- ashkara bolushi kérek

30-Awghust jüme küni, yaponiye mudapi'e ministiri, hazir yaponiyide diplomatik ziyarette boluwatqan xitay dölet mudapi'e ministiri saw gu'angchüen bilen körüshkendin kiyin, xitayni herbiy sélinma jehette téximu ochuq- ashkara bolushqa dawamliq qistaydighanliqini bildürdi. Xitay dölet mudapi'e ministiri saw gu'angchüen diplomatiye ziyariti élip bérish üchün 29- awghust yaponiyige yétip kelgen bolup, bu 10 yildin buyan tunji yaponiyige kelgen xitay herbiy emeldari bolup hésablinidu.

Peyshenbe küni yaponiye dölet mudapi'e ministiri masaxiko komura, xitay mudapi'e ministiri saw gu'angchüen bilen, xitay herbiy paraxotining yaponiyini ziyaret qilishigha yol qoyush qatarliq bir nechche türlük kélishimlerni hasil qildi.

Emma komura xitay mudapi'e ministiri saw bilen körüshkendin kiyin xitayning herbiy sélinma jehette ochuq ‏- ashkara bolushta konkrétni bir pilani yoqluqini bildürdi.

Roytérs agéntliqining bu heqte bergen xewiride yaponiye mudapi'e ministiri komuraning éytqanliridin neqil élip körsitishiche, komura: " biz xitay terep bilen bolghan her bir uchrishishimizda, herbiy sélinma jehette ochuq- ashkara bolush mesilisini otturigha qoyupla kéliwatimiz" dégen.

Xitay bu yil martta oz herbiy hazirliqlar xamchotini 17.8 Pirsent yeni 45 milyard dollar östüridighanliqini élan qilghan idi. Lékin amérika dölet mudapi'e ministirliqi bu yil mayda élan qilghan doklatta béyjingning omumiy herbiy xam choti özi élan qilghan nisbettin ikki hesse yuqiri bolushi mumkin ikenlikini otturigha qoyghan.

Yaponiye metbu'atlirida, xitay herbiy xamchoti jehette herxil qarashlar otturigha qoyulghan bolup, yomi'ori gézitide körsitilishiche, yaponiyini öz ichige alghan bashqa döletlerning, xitayning herbiy xamchoti jehettiki qedimige yéqindin diqqet qilishi bir tebi'iy ish iken. (Jüme)