Шинзо абе японийә баш министирлиқиға сайланди

японийидә һакимийәт үстидики әркин демократлар партийисиниң рәһбири шинзо абе сәйшәнбә күни койзуминиң орниға японийә баш министири болуп сайланди. Абе 2 - дуня урушидин кейин туғулған тунҗи японийә баш министири болуп һесаблиниду.

Шинзо абе баш министирлиққа сайланғандин кейин ички кабинет тәшкилләшкә башлиған. У, сайлам риқабитидә әгәр баш министирлиққа сайлинип қалса, японийә - америка мунасивитини күчәйтидиғанлиқини, хитай вә җәнубий корийә билән өз ара ишәнч турғузуш үчүн тиришидиғанлиқини тәкитлигән иди. Абениң әскәртишичә, у японийиниң б д т хәвпсизлик кеңишигә даими әза болуши үчүн үзлүксиз тиришидикән.

Америка ташқи ишлар министири кондилиза райис, дүшәнбә күни абе баш министир болғандин кейин японийиниң хитай билән йеқинлишидиғанлиқини билдүрди. японийә ташқи ишлар министири таро асу, йеңи һөкүмәтниң хитай - японийә алий дәриҗиликләр сөһбити өткүзүш пилани барлиқини тәкитлигән.

Хитай һөкүмити ху җинтав билән койзуминиң 2005 - йили 4 - айда елип барған учришишидин кейин, хитай - японийә юқири дәриҗиликләр сөһбити өткүзүшни һазирғичә рәт қилип кәлмәктә иди. (Әркин)