Shinzo abé yaponiye bash ministirliqigha saylandi

Yaponiyide hakimiyet üstidiki erkin démokratlar partiyisining rehbiri shinzo abé seyshenbe küni koyzumining ornigha yaponiye bash ministiri bolup saylandi. Abé 2 - dunya urushidin kéyin tughulghan tunji yaponiye bash ministiri bolup hésablinidu.

Shinzo abé bash ministirliqqa saylan'ghandin kéyin ichki kabinét teshkilleshke bashlighan. U, saylam riqabitide eger bash ministirliqqa saylinip qalsa, yaponiye - amérika munasiwitini kücheytidighanliqini, xitay we jenubiy koriye bilen öz ara ishench turghuzush üchün tirishidighanliqini tekitligen idi. Abéning eskertishiche, u yaponiyining b d t xewpsizlik kéngishige da'imi eza bolushi üchün üzlüksiz tirishidiken.

Amérika tashqi ishlar ministiri kondiliza rayis, düshenbe küni abé bash ministir bolghandin kéyin yaponiyining xitay bilen yéqinlishidighanliqini bildürdi. Yaponiye tashqi ishlar ministiri taro asu, yéngi hökümetning xitay - yaponiye aliy derijilikler söhbiti ötküzüsh pilani barliqini tekitligen.

Xitay hökümiti xu jintaw bilen koyzumining 2005 - yili 4 - ayda élip barghan uchrishishidin kéyin, xitay - yaponiye yuqiri derijilikler söhbiti ötküzüshni hazirghiche ret qilip kelmekte idi. (Erkin)