Yaponiye bilen xitayning sankako taqim aralliri mesilisidiki ixtilap kücheydi

Yaponiye bilen xitay otturisida sinkako taqim aralliri we uning etrapidiki iqtisadi rayonlarning igilik hoquqini talishish ixtilabi küchiyishke bashlidi. Yaponiye bash ministiri junishiro koyzumi, düshenbe küni xitay da'irilirini sinkako taqim arallirining etrapida néfit we tebi'iy gaz burghilash mesiliside hemkarliq rohi boyiche heriket qilishqa chaqirghan.

Roytérs axbarat agéntliqining xewer qilishiche, koyzumi sinkako taqim arallirining etrapidiki déngiz yüzining " toqunush rayoni emes, hemkarliq rayoni" bolup qélishini ümid qilghan. Yaponiye hökümiti jüme küni sherqiy jonggo déngizidiki yaponiye teripidin iqtisadi rayonimiz, dep qaralghan jaylarda xitaylarning tebi'iy gaz qézish meshghulati élip bériwatqanliqini élan qilghan idi.

Her ikkila dölet iqtisadi échish rayonimiz, dep élan qilghan ixtilap ichidiki yuqiriqi jaylar, yaponlar teripidin sinkaku taqim aralliri dep atalghan. Xitaylar bu jaylarni dyawyudaw dep atimaqta.

Yaponiye hökümiti bu ayning bashlirida yaponiyidiki ongchilar yasighan sinkaku taqim aralliridiki déngiz mayikini ötküziwalidighanliqini jakalighan. Xitay hökümiti yaponiyining herikitini " ighwagerchilik," dep tenqidligen idi. Bu arida xitay chong quruqluqidiki "dyawyu arilini qoghdash fédératsiyisi" dep atalghan bir organ xongkongda özini tizimgha aldurghan. "Béyjing yashlar géziti", mezkur organning dyawyu taqim arallirida sayahetchilik we échish pa'aliyiti bilen shughullinidighanliqini bildürdi. (Erkin)